भांगरभूंय | प्रतिनिधी
प्रवीण आर्लेकारः अटल आसरा येवजणेचीं मंजुरी पत्रां वितरीत
भांगरभूंय । प्रतिनिधी
पेडणें: भाजपाचें सरकार हें सर्वसामान्य लोकांचें सरकार. दरेक सरकारी येवजण निमाण्या घटका मेरेन पावची हे खातीर आपूण वावुरता. फुडारांत एकूय मनीस घरा बगर उरचो ना, अशें पेडणें मतदारसंघाचे आमदार प्रवीण आर्लेकार हांणी सांगलें. आमदारान आपल्या कार्यालयांत पेडणें मतदारसंघांतल्या 90 लाबार्थींक अटल आसरां येवजणे खाला मंजुरी पत्रां वितरीत केले उपरांत ते उलयताले.
ह्या वेळार पेडणें भाजपा मंडळ अध्यक्ष तशेंच चांदेल हसापूरचे सरपंच तुळशीदार गांवस, पेडणेंची नगरसेविका उषा नागवेंकार, धारगळचे सरपंच अनिकेत साळगांवकार, पोरस्कडेची सरपंच निशा हळदणकार, नगरसेविका विशाखा गडेकार, विर्नोडेंची सरपंच सुजाता ठाकूर, वारखंडची सरपंच गौरी जोशालकार, तोरशेंचीं सरपंच प्रार्थना मोटे, पंच स्वाती मालपेंकार, वजरीचे सरपंच अनील शेट्ये आनी हेर मानेस्त हाजीर आशिल्ले.
लोकांचो आदार मेळत जाल्यार कसलीच उदरगत आडावची ना. सरकारी येवजण्यो दरेकल्या मेरेन पावोवपाचो आपूण यत्न करता, तसोच तो थळावे पंचायतीन करचो. सरकारान गरज वळखून पेडणें मतदारसंघांतल्या वट्ट 89 लाबार्थींक घर दुरुस्ती खातीर मंजुरी पत्रां वितरीत केल्यांत. हे मुखारूय पांवड्या पांवड्यान खूबशा जाणआंक अशा येवजण्यांचो लाव मेळोवन दिवपाचो आपलो यत्न आसतलो. चडांत चड घरां दुरुस्ती येवजणे खालाचे लाबार्थी पेडणें मतदारसंघांत चड आसात. ताका लागून आपूण ह्या खात्याचे मंत्री सुभाष फळदेसाय हांचे उपकार मानता, अशें आमदार आर्लेकार हांणी सांगलें. दरेका घरांत कसली ना कसली सरकारी येवजण पावल्या. ताका लागून दरेकल्यान हे येवजणेची म्हायती हेरांकूय दिवची आनी फुडारांत भाजपाक तेंको दिवचो, असो उलो आमदार आर्लेकार हांणी मारलो.
ल्हान जावं पूण दरेकल्याक स्वताचें घर आसचें. हे खातीर प्रधानमंत्री नरेंद्र मोदी हांणी अटल आसरा येवजण चालीक लायल्या. केंद्रांत 9 आनी राज्यांत 10 वर्सां भाजपाचें सरकार आसा. भाजपा सरकार लोकांच्या हिता खातीर वावुरता, अशें तुळशीदास गांवस हांणी सांगलें.
प्रार्थना मोटा हांणी सांगलें, पेडणें मतदारसंघांतल्या 89 लाबार्थ्यांक आयज मंजुरी पत्रां वितरीत केल्यांत. अशे आनीक खूबशे लाबार्थी आसात. तांकांय पांवड्या पांवड्यान हे येवजणेचो लाव मेळटलो. अनिकेत साळगांवकार हांणी सांगलें, अटल आसरा येवजणे खाला 50 टक्के अनुदान अर्थांत निधी पयलीं दितात आनी उरिल्ले 50 टक्के उपरांत दितात. तातूंत बदल करून पुराय रक्कम एकाच वेळार दिली जाल्यार पावसाळ्या आदीं लाबार्थींक घर दुरुस्ती करपाक मेळटली.
सरकार कसलोच भेदभाव करिनाः गांवस
भाजपा सरकार दरेक येवजण दरेका मेरेन पावयतना कसलेच तरेचो भेदभाव, समाज, जातीभेद करिना. दरेकल्या मेरेन सरकारी येवजण पावची हे खातीर भाजपा सरकार आनी सरकाराचे कार्यकर्ते वावुरतात, अशें भाजपा मंडळ अध्यक्ष तुळशीदास गांवस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
