भांगरभूंय | प्रतिनिधी
भारतीय चलन हो आमचे दिसपट्टे जिणेचो एक अभिन्न भाग आनी होचलन सगळेच वापरतात. भारतीय चलन म्हळ्यार ‘रुपया’.हाचो वापर आयच्या डिजिटल युगांत लेगीत सगळे करतात. देशांत एक रुपया ते ५०० रुपया मेरेन चलन नोटी आसात.
सद्या चलनांत १ रुपया, २ रुपया, ५ रुपया, १० रुपया, २० रुपया, ५० रुपया, १०० रुपया, २०० रुपया आनी ५०० रुपयांच्यो नोटी आसात. ह्या नोटींचेर कोण सय करता? ह्या प्रस्नाक तुमी भारतीय रिझर्व्ह बँकेचो गव्हर्नर म्हूण जाप दितले. पूण तुमची जाप चुकीची आसा. ह्या सगल्याच नोटींचेर आरबीआय राज्यपालाची सय नासता. एक रुपयाची नोट वेगळी आसता. ताचेर आरबीआयच्या राज्यपालाच्या जाग्यार अर्थ सचीवाची सय आसता. ताका एक खाशेलें कारण आसा.
नोटी खंय छापतात?
भारतांतल्या नोटी संबंदीं २०१६ वर्सा म्हत्वाचो निर्णय घेतिल्लो. त्या वेळार ५०० आनी एक हजार रुपयांचे नोटींचें विमुद्रीकरण जालें. त्या वेळार नवी ५०० रुपयांची नोट आनी नवी २,००० रुपयांची नोट सुरू जाली. तशेंच २०० रुपयांची नोट आयली. उपरांत मे २०२३ वर्सा भारतीय रिझर्व्ह बँकेन २,००० रुपयाच्यो नोटी प्रचलनांतल्यान काडपाक सुरवात केली. सप्टेंबर २०२३ मेरेन ती कायदेशीर मुद्रांत आशिल्ली. ह्या सगळ्या नोटींचेर भारतीय रिझर्व्ह बँकेच्या गव्हर्नरांची सय आशिल्ली. भारतांत नाशिक (महाराष्ट्र), देवास (मध्य प्रदेश), म्हैसूर (कर्नाटक) आनी साल्बोनी (अस्तंत बंगाल) हांगा ह्यो नोटी छापतात.
एक रुपयांचे नोटीचेर राज्यपालांची सय कित्याक ना?
भारतांत एका रुपयाची नोट सोडून हेर सगळ्यो नोटी भारतीय रिझर्व्ह बँकेन चलनांत हाडटा. पूण एकूच रुपयाची नोट तीच जी रिझर्व्ह बँके बदला भारत सरकार प्रचलनांत हाडटा. ताका लागून नोटीचेर रिझर्व्ह बँकेच्या गव्हर्नरा बदला अर्थ सचीवाची सय आसता. ह्यो नोटी छापतना गुलाबी आनी पाचव्या रंगाच्या कागदाचो उपेग करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
