भांगरभूंय | प्रतिनिधी
सद्याक महाराष्ट्रांत लागीं आयिल्ल्या दोन भांवांची चर्चा सुरू आसा. जें खंय बाळ ठाकरेक जमलें ना तें सद्याच्या भाजपाच्या मुख्यमंत्र्यान करून दाखयलें अशें कांय जाणांचें मत जालां. चर्चा अशे तरेन चल्ल्या ती पळेल्यार आतां रोखडेंच ह्या दोन भांवांचें राज्य महाराष्ट्रांत येतलें काय असो प्रस्न कोणाकूय पडूं येता. हांगा एक गजाल मतींत दवरूंक जाय ती म्हणल्यार युती दोन भावांची जाल्या दोन मनांची न्ही. आतां ही दोन भावांची युती कितलो तेंप तिगतली तें काळूच थारायतलो. मनांच जर जुळ्ळीं ना जाल्यार युती तिगतली? आनी भाव एकठांय आयले तरी कार्यकर्त्यांचें कितें? ते फाटलें सगलें विसरून एकठांय येतले? तांचीं मनां तरी जुळटलीं? दुबाव!
तशें पळोवंक गेल्यार दोनूय भाव एकठांय येवचे म्हूण जायते जाण फाटलीं साबार वर्सां यत्न करताले. पूण तांच्याच पक्षांत अशे कांय लोक आसात जांकां ही युती जाल्ली नाका आसली. फाटल्या साबार वर्सांच्यो घडामोडी पळेल्यार एक गजाल स्पश्टपणान जाणवता ती म्हणल्यार महाराष्ट्रांतलें राजकारण एक वेगळें वळण घेता. बाळ ठाकरेचें काँग्रेसी कडेन कशेंच पटनासलें. ताका काँग्रेस सामकी सोंपिल्ली जाय आसली. ठाकरेचें खंयचेंय भाशण काडून आयकात. तो काँग्रेसीचेर सामकी सकल्या थरार वचून टिका करतालो. आनी देखून तर ताणें हिंदुत्व ह्या एकाच मुद्द्याचेर युती केल्ली. आतां भाजपा कडेन युती केल्ल्या पक्षाचें कितें जाता तें आमी पळेत आसात. गोंयचेंच उदाहरण दिवं येता. धाकटो भाव म्हणून व्हडल्या भावाचें बोट धरून चलूंक लागतनाच ताका कसो सोपयता तें हांगा दिसतलें. महाराष्ट्रांतूय तेंच घडलें. पूण तें पळोवंक बाळ ठाकरे नासलो.
घडये बाळ ठाकरे आशिल्लो जाल्यार महाराष्ट्रांत आयचेवरी राजकारणाक वळण मेळपाचें नासलें. कारण ताची तशी धांक आसली आनी तो सत्ते खातीर काँग्रेसी कडेन हात मेळोवचो नासलो. ताणें सदांच सत्तेचो रिमोट कंट्रोल आपणा कडेन दवरलो पूण सत्तेंत वांटो घेतलो ना. आपल्या पुताक आनी नातवाक तो मंत्री जावंक दितलो आसलो काय हाचो दुबाव येता. परिणाम युती तुटची नासली आनी आज जे दशेक शिवसेना पावल्या ती परिस्थिती येवची नासली. उद्धवाक मुख्यमंत्रीपदाची हाव जाली आनी ताणें आपल्या पक्षाचेर कुराड मारून घेतली. तशें पळोवंक गेल्यार राजकारण हें उद्धवाचें क्षेत्र न्ही. पूण ताका जे सल्लागार मेळ्ळे तांणी ताची वाट लायली अशेंच म्हणचें पडटलें. पयलीं शिवसेनेचें मुखेलपद आनी उपरांत मुख्यमंत्रीपद. तशें बाळासाहेबाक मनाविरुद्धूच उद्धवाक शिवसेना प्रमुख करचो पडलो. पुत्र प्रेम आडवें आयलें आनी हांगाच दोन भावां मदीं क्लेश निर्माण जालो. सेनाप्रमुख म्हूण शिवसैनिकांनी सदांच राज ठाकरेकूच प्राधान्य दिल्लें. तांकां जरी बाळासाहेबाचो निर्णय मान्य नासलो तरी तांकां तो मानून घेवचोच पडलो. हाकाच लागून पक्ष फुटलो आनी दुसर्या भावान महाराष्ट्र नवनिर्माण सेना जल्माक घाली. मनसे मुखार वता हें पळोवन उद्धवान मनसेच्या आमदार, नगरसेवकांक फोडून आपणां कडेन हाडले. कसोय करून भावाक आनी ताच्या पक्षाक सोंपोवप हेंच ताचें ध्येय जालें.
भायल्यान आयिल्ल्यांक चड मेळटा आनी मुळचे कार्यकर्ते तशेच उरता हें पळोवन मूळ कार्यकर्त्यांच्या मनांत राग निर्माण जावप साहजीक. तातूंत एकदां फोडपाची वा फुटपाची सवंय लागली म्हणजे कार्यकर्त्यांकूय सगले पक्ष एकूच दिसूंक लागता. तातूंत काल पयरचो भुरगो सत्ता भोगता आनी इतलीं वर्सां जांणी कार्यकर्ते म्हणून काम केलें ते कुशिकूच उरतात होय राग मनांत धुसफुसता. हांगाय तेंच जालें. सत्ते खातीर ध्येय सोडूं येता म्हणपाचें सेना प्रमुखानूच शिकयलें. मुख्यमंत्रीपद मेळचे खातीर हिंदुत्व सोडूं येता जाल्यार सत्ते खातीर पक्ष सोडल्यार कितें जालें? ह्याच विचारान कांय जाण एकठांय आयले आनी तांणी आपणालो शिवसेना गट तयार केलो. मुखावेलो इतिहास सगल्यांक खबर आसा. आपलो पक्ष सोंपता आनी आपणांक आतां कसलोच फुडार ना हें कळिल्ल्यानूच दोनूय भावांक मनांत नासतनाय एकठांय येवचें पडलें. एकठांय येवंक तांकां कसलें तरी निमित्त जायच आसलें तें सरकारान दुसरी भास म्हूण हिंदी शिकोवपाच्या निर्णयाक लागून मेळ्ळें. हिंदी शिक्षण हें फक्त निमित्त. बुडटल्याक बडयेचो आदार म्हणटात तसो हांकां मराठीचो आदार मेळ्ळा. आनी मराठीच्या नांवांन ते एकठांय आयल्यात. आतां जनता हांकां कितली पातयेतली तें पळोवप गरजेचें. कारण हिंदी महाराष्ट्राक परकी न्ही. महाराष्ट्राची भास जरी मराठी म्हणली तरी महाराष्ट्रांत हिंदींतल्यानूच वेव्हार चलतात हें सत विसरूंक जावचें ना. तातूंत विदर्भ, मराठवाड्यांतल्या लोकांक आपले बोलीची लज दिशिल्ल्यान तांणी हिंदीकूच आपली मानल्या. तांचें उलोवप लेगीत हिंदींतल्यान जाता. हाका आनीक एक कारण म्हणल्यार जी मराठी महाराष्ट्रांत मानून घेतल्या ती पुणेरी. लोकांक तोय राग आसाच. म्हणटकूच मराठी हांगा तिगतली काय कितें तें येवपी काळूच सांगतलो.
आतां दोगूय भाव एकठांय आयल्यात, समजुया मराठीच्या नांवांन लोकांनी तांकां सत्तेर हाडले जाल्यार ही एकी उरतली काय हांव मुखेली, म्हाका चड सीट जाय करीत परतून आपणां मदींच झुजतले? सत्तेची हाव तांकां वांगडा रावंक दितली? नाय जाल्यार राज भाजपाक लागीं आसाच. यो, तुकाच मुख्यमंत्री करतां म्हणल्यार ‘काय ते दोंगर, काय ते हाटेल’ करीत सत्ते फाटल्यान वचचो ना हाची खात्री कोणाच्यान दिवंक जातली? आनीक एक गजाल सगल्यांनीच मतींत दवरूंक जाय ती म्हणल्यार लोक आतां पिशे नात. तांकांय कोण कसो तें बेस बरें कळटा. लोक सदांकाळ मूर्ख आसतले अशें कोणेच समजुचें न्ही.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
