भांगरभूंय | प्रतिनिधी
पणजीः उजो पालोवपी दळान 1 जानेवारी ते 31 डिसेंबर 2023 ह्या काळांत 190 जाणांचे जीव वाटायले. तशेंच 690 जनावरांक वाटावपाक दळाक येस आयलें. एका वर्सांत दळाक 9132 कॉल आयले. खात्यान सुमार 37 कोटी 21 लाख रुपयांची मालमत्ता वाटायली. खात्याचे संचालक नितीन रायकार हांणी ही म्हायती दिली.
मेळिल्ले म्हायती प्रमाण उजो पालोवपी दळाक आयिल्ल्या 9132 कॉल्सांतले उज्या संबंदांत 4320, पावस आनी हवामान विशींचे 2742, हेर आपत्कालीन 2031, उदका विशीं 15 जाल्यार जीयोफिजीकला संबंदांत 24 कॉल आशिल्ले. केंद्रा प्रमाण पळयत जाल्यार म्हापश्यां 925, फोंड्यां 885, मडगांवां 821 जाल्यार दिवचल केंद्रांत 808 कॉल आयिल्ले.
ह्या काळांत विवीध आपत्कालीन घडणुकेंत सुमार 8 कोटींच्या मालमत्तेचें लुकसाण जालें. पोरूं गोंयांतल्या विवीध उज्याच्या आनी हेर आपत्कालीन घडणुकांनी 136 मनीस आनी 65 जनावरांक मरण आयिल्लें.
गोंयांत पावसाळ्यांत झाडां पडपाच्यो घडणुको परतून परतून घडटात. उज्याच्या कॉला उपरांत पावस वा हवामान संबंदांतल्या दुर्घटणां खातीर कॉल येतात. पोरूं हे संबंदांत आयिल्ल्या 2742 कॉलांतले सगळ्यांत चड 1170 कॉल रस्त्याचेर झाडां पडपा विशींचे आशिल्ले. घराचेर झाड पडिल्ल्याचे 600 जाल्यार लायटीच्या सरयांचेर झाडां पडपा विशींचे 519 कॉल आशिल्ले. ह्या 2742 तले सगळ्यांत चड कॉल कुडचडें केंद्रांत आयिल्ले. ताच्या फाटोफाट पेडण्यां 235 कॉल आयिल्ले.
बार्देस म्हालांत सगळ्यांत चड कॉल
म्हालांचें आंकडेवारी प्रमाण बार्देस म्हालांत सगळ्यांत चड 1652 कॉल आयिल्ले. तातूंत उज्या संबंदांत 893 कॉल आशिल्ले. ताचे फाटोफाट साश्टींतल्यान 1308, तिसवाडींत 1230, फोंड्यां 1179 जाल्यार दिवचल म्हालांत 746 कॉल आयिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
