भांगरभूंय | प्रतिनिधी
पणजी : एका पुलीस शिपायाच्या शिटुकसाणेक लागून गोंय आनी हैदराबाद मजगतीं कार्यरत आशिल्ले व्हड ड्रग्ज आनी हवाला रॅकेट उक्ताडार आयलें. तेलंगण अँटी-नार्कोटिक्स ब्युरो आनी गोंय पुलिसांच्या जोड तपासांत हे टोळयेचें जाळें देशभरांत पातळिल्ल्याचें उक्तें जालां. एका पोरण्या ड्रग्ज प्रकरणांतल्या आरोपीच्या दुबावी वागणुकेक लागून तपासाची सुरुवात जाली आनी हातुंतल्यानूच मार्ग काडीत टीजीएएनबीन नायजेरिया मेरेन पातळिल्ल्या ड्रग्ज आनी हवाला सिंडीकेटाक उक्ताडार हाडलें.
नेमकें प्रकरण कितें?
ही घडणूक हैदराबादच्या एका कोर्टांत घडली. २०१८ वर्साच्या ड्रग्ज प्रकरणांतलो एक दुबावीत लिव्हिओ जोसेफ आल्मेदा, हो दर सुनावणे खातीर कोर्टांत हाजेरी लायतालो. मात ताची वागणूक सदांच आबुजपाची आनी ताकतिकेची दिशिल्ल्यान एकल्या पुलीस शिपायाक ताचेर दुबाव आयलो. वरीश्ठ अधिकार्यांक हाची म्हायती दिली आनी तपास सुरू जालो.
लिव्हिओची फाटपुरवण करतना तेलंगणा अँटी-नार्कोटिक्स ब्युरोन ताका ताब्यांत घेतले आनी चवकशे मजगतीं जायतें कितें उक्ताडार आयलें. तो पर्रा गांवांतल्यान कोकेन आनी एमडीएमए सारकिल्लीं घुवळे वखदां हैदराबादच्या वट्ट ४८ गिरायकांक दितालो. ताचो आदीं अटक केल्लो वांगडी उबलंका शंकर हांचे वरवीं हो सगलो वेव्हार चलतालो.
लिव्हिओचे चवकशेंतल्यान आनीक एका नायजेरियन मनशाचो बेंजामिन फोसु चो तपशील मुखार आयलो. फोसु हो गोंयच्या हणजूण आनी शिवोले अश्या पर्यटन स्थळांचेर नायजेरियन टोळयां वरवीं ड्रग्ज विकतालो. ताचे कबुली उपरांत गोंयच्या कांय ड्रग पेडलर्सांचेरूय लक्ष केंद्रीत केलें.
तपास मुखार वतना, आनीक एक व्हड नांव मुखार आयलें तें म्हळ्यार इमॅन्युएल बेदियाको उर्फ मॅक्सवेलचें. हैदराबादच्या ताका अटक केली आनी ताचे कडल्यान वट्ट १.२५ कोटी रुपयांचीं घुवळे वखदां ‘सेलिब्रिटी कोकेन’ आनी एमडीएमए जप्त केलीं. मॅक्सवेल २०१३ सावन तीन फावटीं भारतांत वेगवेगळ्या पासपोर्टाचेर येवन ड्रग्ज तस्करी करताले. तांणी ड्रग विक्री आनी हवालो वेव्हारांतल्यान वट्ट १.१७ कोटी रुपया जोडिल्ल्याची म्हायती मेळ्ळ्या. ताचे कडेन संबंदीत हेर दोन नायजेरियन नागरीक अद्याप फरारी आसात.
मॅक्सवेलचे चवकशेंतल्यान उक्तें जालें, ड्रग्ज फकत गोंय ते हैदराबादच न्हय, जाल्यार बंगळुरू आनी केरळांतूय धाडटाले. हाका लागून गोंयच्या पर्रा, कळंगुटे, शिवोले आनी हणजूण वाठारांतलीं घरां, फ्लॅट आनी लॉजांचो वापर करताले. गिरायकां मेरेन हीं घुवळे वखदां कुरियर, खाजगी गाडयो वा प्रवाशां वरवीं पावयताले.
मॅक्सवेलचे म्हायतीवेल्यान पुलिसांनी म्हापशें वाठारांतल्या ’हायलँड पार्क’ इमारतीचेर छापो घातलो. थंय वॉशिंग मशीनांत लिपोवन दवरिल्ले ४९.६५ लाख रुपया पुलिसांनी जप्त केले. हे पयशे हवाला मार्गांतल्यान परदेशांत विशेश म्हळ्यार नायजेरियांत धाडपाची तयारी सुरू आशिल्ली. हे पयशे मेळोवपा खातीर फकत दोन दिसांनी मुंबयच्या ‘संगीता मोबाइल शॉप’चो धनी उत्तम सिंग हांणी हे पयशे एकठांय केल्ल्याचें कळ्ळें. ताका ताब्यांत घेतला, हवाला वेव्हारांत ताचे वांगडा राजू सिंग आनी महेंद्र उर्फ बॉबी हांचीय भुमिका तपासतात.
पुलिसांनी तपासा मजगतीं व्हॉट्सपावेल्यान ५, १०, २० रुपयांच्या नोटांचे फोटो धाडून पयशे एकठांय करपाची एक वेगळी पद्धतूय उक्ताडार हाडल्या. अशे तरेन सुमार १५० वेव्हार करून १० कोटी रुपयां परस चड रक्कम नायजेरियांत धाडिल्ली.
सध्या ह्या पुराय नेटवर्काचो तपास तेलंगणा अँटी-नार्कोटिक्स ब्युरो करतात. हातूंत गोंय पुलिसांची विशेश टिमूय वांटेकार आसा. ह्या प्रकरणांतल्यान भारतांत सक्रिय आशिल्ले आंतरराष्ट्रीय ड्रग्ज आनी हवाला सिंडिकेट मुखार आयलां. आनीक अटक आनी कारवायो जावपाची शक्यताय उक्तायतात. न्यायालयांतल्या एका पुलीस शिपायाचे जागरूकतायेन सुरू जाल्ल्या तपासान आतां पुराय देशभरांतले ड्रग्ज आनी हवाला जाळ्याच्या मुळा मेरेन वचपाचो मार्ग दाखयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
