एका इन्स्टा पोस्टाक ११ कोटी ४५ लाख रु.
भांगरभूंय | प्रतिनिधी
विराट कोहली म्हणटा, इतले मेळनात
नवी दिल्ली : खेळ, सिनेमा मळा वयल्या सेलेब्रिटींनी सोशल मिडियाचेर कसलीय पोस्ट घाली काय धडाधड कोट्यांनी लोक लायक, शॅर करीत रावतात. हजारांनी लोक कमेंट करतात. ह्या पोस्टां पसून सोशल मिडियाक फायदो जाता आनी तातूंतलो बरोच मोठो वांटो ते त्या सेलेब्रिटीक दितात. मात विराट कोहलीन आपल्या सोशल मिडियाचेर इतले पयशे मेळनात, अशें म्हणलां. ‘जिणेंत म्हाका जें कितें मेळ्ळें ताचे विशीं हांव कृतज्ञ आसा. पूण म्हजे जोडीच्यो सोशल मिडियाचेर आशिल्ल्यो खबरो खऱ्यो न्हय.’ अशें तांणे शेनवारा सांगलें. मजगतीं, इन्कम टॅक्सा पसून स्वताक वाटावपाक तो अशें म्हणटा, अशी टिका कांय लोकांनी केल्या.
हालींच होपर संस्थेन इन्स्टाग्राम रिच वळेरी जारी केल्या. तातूंत विराटाक एक पोस्ट करतकच 13 लाख 84 हजार डाॅलर (11 कोटी 45 लाख रुपया) मेळटात अशें म्हणलां. कोहली 14 व्या क्रमांकाचेर आसा. पुर्तुगालाचो फुटबाॅल खेळगडो क्रिस्तियानो रोनाल्डो पयल्या क्रमांकाचेर आसा. ताका 32 लाख 34 हजार डाॅलर (26 कोटी 75 लाख रुपया) मेळटात, तर अर्जेंटिनाच्या लिओनेल मेस्सीक (दुसरो क्रमांक) 25 लाख 97 हजार डाॅलर (21 कोटी 49 लाख रुपया) मेळटात. अमेरिकन गायिका सेलेना गोमेझाक 25 लाख 58 हजार डाॅलर मेळटात. तर प्रियांका चोप्राक 5 लाख 32 हजार डाॅलर मेळटात, अशें होपर संस्थेन म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
