भांगरभूंय | प्रतिनिधी
पणजी: सिद्दिकी सुलेमानाक गुन्यांव अन्वेशण फांट्यातल्या बंदखणींतल्यान पळून वचपाक मजत करपी अमीत नायक ह्या एका कान्स्टेबलाक लागून पुराय पुलीस प्रशासनाक दोन दिवप चुकीचें आसा. सुलेमानाक धरपा खातीर गोंय पुलिसांनी फाटले धा दीस केल्ल्या खर यत्नांक येस मेळ्ळें आनी सुलेमानाक परतून अटक जाली, अशें पुलीस म्हासंचालक अलोक कुमार हांणी सोमारा प्रुंडट खबरा चॅनलाच्या ‘हेडऑन’ कार्यावळींत उलयतना स्पश्ट केलें.
गुन्यांव अन्वेशन फांट्यांतल्या बंदखणींतल्यान पळून गेले उपरांत जो व्हिडियो जारी केला तातूंत ताणें आपल्याक बारा पुलिसांनी मजत केल्ल्याचें स्पश्ट केलें. हें आयकूनच आपल्याक अजाप दिसलें. उपरांत आपणें स्वता ह्या प्रकरणाची चवकशी सुरू केली. ज्या सुलेमानाक धरपा खातीर गोंय पुलिसांनी तीन म्हयने खर यत्न केल्ले, तेच पुलीस ताका सोडोवपा खातीर कशे किते यत्न करतले हो सगल्यांत मोटो प्रस्न आशिल्लो. हातूंतल्यान सुलेमानाक पळून वचपाक फक्त अमीत नायक ह्या एकाच कॉन्स्टेबलान मजत केल्ल्याचें आतां मेरेनच्या तपासांत दिसून आयलां अशें अलोक कुमार हांणी म्हणलें.
सुलेमान बंदखणींतल्यान पळून गेले उपरांत ताका परतून अटक करप हीच आमची मोख आशिल्ली. ते खातीर ताचे विशीं सोशल मिडिया वरवीं व्हायरल जावपी बातम्यां कडेन आडनदर करून आमी विवीध राज्यांनी चौदा पंगड तैनात केल्ले. ह्या काळांत व्हिडियो जारी करून ताणें गोंदळ निर्माण करपाचोय यत्न केलो. पूण केरळ पुलिसांचे मजतीन ताका परतून अटक करपाक गोंय पुलिसांक येस मेळ्ळें. सुलेमान सद्या गोंय पुलिसांच्या ताब्यांत आशिल्ल्यान ताचे चवकशेंतल्यान ताच्या पळपा फाटलें सत्य निश्चीत भायर येतलें अशें तांणी सांगलें.
सायबर क्रायम, रस्ते अपघात आव्हान
– सायबर क्रायमा पसून गोंयकाराक वाटावप हें सद्या आमचे मुखा वेलें मोटें आव्हान आसा. ते खातीर सायबर क्रायम पुलीस स्टेशनाक घटाय दिल्या. सायबर क्रायमांत कार्यरत आशिल्ल्या सुमार 800 पुलिसांक प्रशिक्षणूय दिलां. सायबर क्रायमांत फटवणूक जाल्ल्या राज्यांतल्या सात ते आठ टक्के लोकांचे पयशे वाटावपाक हाचे पयलीं येस मेळटालें. पूण आतां फटवणूक जाल्ल्या 30 टक्के लोकांचे पयशे वाटावपाक आमकां येस मेळत आशिल्ल्याचें अलोक कुमार हांणी सांगलें.
– राज्यांतले रस्तो अपघात मरणाचेर नियंत्रण हाडपाचे यत्नूय पुलिसांनी सुरू केल्यात. ते खातीर रस्तो सुरक्षा आराखड्याचेर काम सुरू आशिल्ल्याचें तांणी नमूद केलें.
गोंय ल्हान राज्य आसलें, तरी पर्यटनाचे नदरेन संवसारभर ताची नामना आसा. पर्यटन तशेंच विवीध राष्ट्रीय, आंतरराष्ट्रीय कार्यावळीं खातीर दर वर्सा लाखांनी पर्यटक गोंयांत येत आसतात. तांकां सुरक्षा दिवपाची तशेंच कायदो आनी सुवेवस्था सांबाळपाची जापसालदारकी पुलिसांची आसा. गोंयांत येवपी पर्यटकांचीं वाहनां एकदा तपासले उपरांत तांची तपासणी परतून जावची न्हय हे खातीरच्या तंत्रज्ञानाची अंमलबजावणीचे यत्न पुलिसां कडल्यान सुरू आशिल्ल्याचेंय अलोक कुमार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
