एकादस तीर्थ उपक्रमांत गोंयांतल्या 11 देवळांचो आस्पाव

भांगरभूंय | प्रतिनिधी

अध्यात्मीक पर्यटनाक चालना दिवपाक देवळांची जातली उदरगतः पर्यटन खातें

भांगरभूंय । प्रतिनिधी

पणजीः अध्यात्मीक पर्यटनाक अदीक चालना दिवपा खातीर पर्यटन खात्याच्या एकादशी तीर्थ उपक्रमा खाला गोंयांतल्या फामाद 11 देवळांचो देवदर्शन (एकादस तीर्थ) उपक्रमांत आस्पाव केला. एकादस तीर्थ ह्या उपक्रमा खाला 11 देवळांची मुळावी सुविधा वाडोवपा वांगडाच गरजेची सुविधा उपलब्ध करतले. तशेंच देवळांचे सोबितीकरण करतले. ह्या देवळांनी वचपाक प्रवास सुविधा उपलब्ध करपा खातीर उपाय येवजण आंखतले, अशी म्हायती पर्यटन खात्यान दिली.

पर्यटन मंत्री रोहन खंवटे हांणी हालींच ‘एक्स’ अॅपा वरवीं म्हायती दितना सांगिल्लें, दर्या पलतडी वचून पुराणीक अध्यात्मीक गिरेस्तकाय दाखोवपा खातीर गोंयचीं 11 देवळां देवदर्शन उपक्रमा खाला हाडपाचेर गोंय पर्यटन खात्याचो ​विचार आसा.

पर्यटन मंत्र्यांनी घेतिल्लो हो फुडाकार आतां प्रत्यक्षांत आयला आनी 11 देवळांचो एकादस तीर्थ ह्या देवदर्शन उपक्रमा खाला आस्पाव करून घेतला. हातूंत मंगेशीचें श्रीमंगेश देवस्थान, म्हाड्डोळचें श्रीमहालसा नारायणी देवस्थान, तांबडी सुर्लाचें महादेव मंदीर, नार्वेचें श्रीसप्तकोटेश्वर देवस्थान, सत्तरीचें श्रीब्रम्ह देवस्थान, फातर्पेचें श्रीशांतादुर्गा देवस्थान, मडगांवचें हरी मंदीर, जांबावलेचें श्रीदामोदर मंदीर, पैगिणीचें परशुराम देवस्थान, खांडोळ्याचें श्रीमहागणपती देवस्थान आनी सांखळेचें श्रीदत्तात्रय देवस्थान ह्या देवळांचो आस्पाव केला.

ह्या 11 देवळांक भेट दिवपाक सोंपे जावचे हे खातीर पर्यटन खातीर एकादस तीर्थ मार्गांची उदरगत करता. हालींच जाल्ले देवळांचे समितीचे बसके वेळार हे मार्ग कशे वाडोवचे ह्या धोरणाचेर चर्चा जाली. पर्यटन खातें देवळा भितरले आनी लागसारच्या वाठारांतले फुटपाथ, लायटी आनी हेर गजाली सुविधा सुदारतले.

सोशल मिडिया, आनी राश्ट्रीय तशेंच अंतरराष्ट्रीय इव्हेंटांत खातें सक्रियपणान एकदास तीर्थ खाला देवळांचो प्रचार करतले. देवळांच्या वाठाराचें सोबितीकरण करप, रस्ते जोडणी सुदारपाचेर आनी गरज आसा थंय सुविधेंत भर दिवपाचेर खातें काम करता. तशेंच देवळां विशीं म्हायती दिवपी बुकलेट खातें तयार करतलें.

अध्यात्मीक पर्यटनाचेर नवीन दिश्टीकोन एकादस तीर्थ दिता. ह्या उपक्रमा खाला अध्यात्म आनी सांस्कृतीक दायजाच्या म्हत्वाचेर पर्यटन खातें उजवाड घालता. पर्यावरण, सांस्कृती हाका जोडून आशिल्ल्या समुदायाचेर सकारात्मक परिणाम जावचो हे खातीर पर्यटन खातें यत्न करता आनी पुनरुत्पादन पर्यटनाची बांदिलकी दाखोवन दिता. पर्यावरण आनी थळावे समुदाय ह्या दोगांकूय लाव मेळचो म्हूण शाश्वत पद्दतीचेर लक्ष केंद्रीत करून समुदाय आदारीत पर्यटन उपक्रम घेवपाचेर एकादस तीर्थाचे ध्येय आसा. आयोजक आनी पर्यटक ह्या दोगांचोय अणभव घेवन हो उपक्रम गोंय दर्यादेगांचें म्हत्व अध्यात्मीक पर्यटन कडेन व्हरता. पर्यटन धर्मीक थळां लागसार आशिल्ले समुदाय खासा करून बायल गटां मदीं संपर्कांत रावून तांकां आस्पावन घेवपाचे यत्न आसा. तशेंच पर्यटकांक देवळांक भेट दिवपाक उर्बा दिता. थळावे घराब्यांत रावून तांची जीण समजावन घेवपाक सांगता. पुनरुत्पादन पर्यटन मॉडलाच्या तत्वांक आदार दिवपा खातीर हो उपक्रम फकत सांस्कृतीक दायजूच तिगोवन दवरना जाल्यार थळाव्या समुदाया खातीर अर्थीक संद उपलब्ध करून दिता.