भांगरभूंय | प्रतिनिधी
वाराणसी : हळदीपूर शांताश्रम मठाधीपती श्री वामनाश्रम स्वामीजींची पोरूं विजयदशमी दिसा केरळाच्या कालडी आदी शंकराचार्य जल्म क्षेत्रा वयल्यान आरंभ जाल्ली शंकरा एकात्मत पदयात्रा 201 दीस आनी 3035 कि. मी. चलून अक्षय्य तृतीये दिसा काशींत सोंपली.
22 एप्रील पदयात्रेचो निमणो दीस. दनपरा 3 वरांचेर वाराणसी गोकुल नगरांतल्या तुलसी उद्याना सावन यात्रा सुरु जाली. ढुंढीराज गणेश मंदीर, काशी विश्वनाथ मंदीर आनी अन्नपूर्णादेवीचे दर्शन घेवन पदयात्रा पूर्ण लक्ष पावली. केरळ कोची सावन, कर्नाटक, गोंय, महाराष्ट्र, मध्यप्रदेश, उत्तरप्रदेश, हैदराबाद, तमीळनाडू राज्यांतले मेळून हजारांनी भावीक पदयात्रेंत आनी उपरांत विश्वनाथ सभाघरांत जालें गुरुदर्शन आनी गुरु प्रभाशणांत सहभागी जाल्ले.
रातीं 8 वरार तुलसी उद्यानांत श्री चन्द्रमौलीश्वर देवता पूजा जाली.
आदी शंकराचार्याच्या संदेशाचो प्रचार आनी वैश्य समुहाचे काशींतले नामावशेष जाल्ले मूळ गुरुमठाचे पुन:स्थापन हें वामनाश्रम स्वामीजींचे एकात्मत पदयात्रेचे उद्दिश्ट जावन आसा. समाप्ती कार्यावळीक अनुबंध जावन 24 तारखेक दनपरा मणिकर्णीका घांटाचेर स्मामीजीचें गंगास्नान जालें. उपरांत बिंदुमाधव, काळभैरव, दण्डपाणी, विशालाक्षी मूर्तीचें दर्शन जालें. रात्री 8 वरार तुलसी उद्यानांत चंन्द्रमौळेश्वर पूजा जाली.
25 तारखेक सकाळीं मणीमंदीर मंडपांत श्री शंकर जयंतीक लागून पुजा, पुष्पार्चन आनी उपरांत आशीर्वचन, फळमंत्राक्षत वितरण जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
