भांगरभूंय | प्रतिनिधी
पणजीः एकाच सुवातेर आडकून उरिल्ल्या पुलीसांच्या बदलींची अंमलबजावणी निमाणी सुरु जाल्या. शेनवारा पणजी पुलीस स्टेशनान पांच जाणांक सेवेंतल्यान मुक्त केलें. गोंयांत 2024 सावन बदली जाल्ली आसून लेगीत सुमार 579 पुलीसांक सेवेंतल्यान मुक्त केल्लें ना. हे विशीं बिरेस्तारा खबर उजवाडायिल्ली. उपरांत आतां जायत्या कर्मचाऱ्यांक रोखडीच मूळ पदां वयल्यान मुक्त करपाक सुरवात जाल्या.
हे विशीं चड म्हायती प्रमाण, पुलीस स्थापन मंडळाच्या शिफारशी प्रमाण फाटल्या पांच वर्सांत पुलीस खात्यान जायत्या कर्मचाऱ्यांची बदली केल्या. पूण तातूंतले 579 जाण अजून नव्या सुवातींचेर रूजू जावंक नात. हातूंत अधिकारी तशेंच कर्मचाऱ्यांचोय आस्पाव आसा. कितलींशींच वर्सां एकाच सुवातेर काम करपी अधिकारी आनी कर्मचाऱ्यांची वळेरी पुलीस खात्यान मागयल्ली. तातूंतल्यान पांच वर्सां परस चड काळ एकाच सुवातेर जायते जाण काम करतात हें स्पश्ट जालें.
हाचे आदीं बदली केल्ले पुलीस नव्या सुवातींचेर रूजू जावंक नाशिल्ले. हे संबंदी पुलीस खात्यान 15 आनी 19 सप्टेंबराक बिनतारी संदेश जारी करून कर्मचाऱ्यांक मुक्त करपाचे आदेश दिल्ले. अशें आसून लेगीत आजून सुमार 580 कर्मचारी त्याच सुवातेर आसात. मुख्यालयाचे पुलीस उपमहानिरीक्षक अजय कृष्णन शर्मा हांच्या आदेशा प्रमाण मुखेल कार्यालयाचे अधीक्षक धर्मेश आंगले हांणी बिनतारी संदेश जारी करून सगल्या अधिकाऱ्यांक आनी कर्मचाऱ्यांक मुक्त करपाचे आदेश दिले. तशें करूंक ना जाल्यार संबंदीत पुलीस स्टेशन आनी खात्याच्या मुखेल्या आड खात्या खाला कारवाय करतले अशीय शिटकावणी दिल्ली.
काय कर्मचाऱ्यांनी नवें सपवातींचेर रुजू जावचें बदला परतून तेच सुवातेर बदली करुन घेतिल्ल्याचें मुखार आयलां. कांय कर्मचाऱ्यांनी आपल्या सोयी प्रमाण बदली करपा खातीर राजकी प्रभावाचो वापर केल्ल्याचेंय उक्तें जालें. 2025 वर्सा बदली जाल्ल्या 506 कर्मचाऱ्यां मदीं 3 पुलीस निरिक्षक, 24 उपनिरिक्षक, 39 सहाय्यक उपनिरिक्षक, 60 हवालदार आनी 380 कॉन्स्टेबलांचो आस्पाव आसा.
कांय पुलीस अधिकारी आनी कर्मचारी फाटलीं कितलींशींच वर्सां एकाच सुवातेर आसात. फकत तांच्या बदली खातीर आदेश जारी केल्यात. तांणी नवें सुवातेर रुजू जावप गरजेचें आसा. पूण थंय गेले उपरांत संबंदीत अधिकारी आपल्या मूळ सुवातेर परतून येवपाक आडमेळीं निर्माण करपाक शकतात ह्या भंयान कांय कर्मचारी आदेशाक पाळो दिनात अशी म्हायती सूत्रांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
