भांगरभूंय | प्रतिनिधी
मलिहाबाद, खबरां संस्था: भारतांत सध्या आंब्याचो हंगाम सुरू जाला. बाजारांत आंबे येवपाक लागल्यात. वेगवेगळ्या राज्यांतल्यान आंब्याक व्हड मागणी आसा. ह्या काळांत आंबो बागायतदारांक खूब मान मेळटा. ह्या दिसांनी लोक विवीध जातीचे आंबे रूचीन खातात. पूण एकाच झाडाचेर वेगवेगळे तरेचे आंबे लागिल्ल्याचें तुमी केन्ना पळयलां? अशें कलीम उल्ला खान हांणी करून दाखयलां. म्हणूनच तांकां ‘मँगो मॅन’ अशेंय म्हणटात. भारतांत आंब्याचो मोसम सुरू जालो काय खान हांचे विशीं चर्चा जावपाक सुरवात जाताच.
खान हांणी एकाच झाडाचेर आंब्याच्या ३०० जातींचीं कलमां केल्यांत. उत्तर प्रदेशांतल्या तांच्या मूळ गांवांत मलिहाबाद हांगा १२० वर्सां पोरन्या आंब्याच्या झाडाचेर हो चमत्कारीक प्रयोग तांणी केला. ह्या झाडाक ३०० वयर जातींचे आंबे लागात. दरेक आंब्याची रुच, रंग आनी आकार वेगवेगळे. हो आंबो पळोवपाक बागायतदार आनी आंब्या मोगी खासा येतात.
झाडांचेर सेगीत प्रयोग
खान हे पिरायेच्या १७ व्या वर्सा सावन झाडां सांबाळपाक लागल्यात. ते सेगीत झाडांचो प्रयोग करतात. तांणी जायते प्रयोग करून कितें तरी नवें तयार केलें. सुरवातेच्या काळांत आंबे आनी हेर फळांचीं कलम करपाक सुरवात केली. जायत्या वर्सांची मेहनत आनी कुशळटायेक लागून तांकां तांचे कलाकुसरींत येस मेळ्ळें आनी कलमबाजींत ते फामाद जाले. २००८ वर्सा खान हांचे बागायतीच्या आवडीची राष्ट्रीय पांवड्यार दखल घेतली. तांकां भारतांतलो एक मुखेल नागरी सन्मान आशिल्लो पद्मश्री पुरस्कार मेळ्ळो. हो पुरस्कार बागायती वेवसायांत तांच्या योगदानाक लागून मेळिल्लो.
आंब्यांक दिग्गजांचीं नांवां
कलीम उल्ला खान हांच्या आंब्याच्या जातींक नामनेच्या व्यक्तींच्या नांवा वेल्यान नांवां दिल्यांत. भारतांत आंब्यांच्यो विवीध जाती आसात. तोतापुरी, लंगडा, दशहरी, फाजली, चौसा, सफेदा, रतोल, मानकुराद, आफोन्स, माल्देस, भिस्म आनी हेर. मात खान हांणी एक पावल मुखार घालून तांच्या कलम केल्ल्या आंब्यांच्या जातींक मुखेल व्यक्तींचीं नांवां दिल्यांत. तांची पयली खास जात ‘ऐश्वर्या’. प्रत्यक्षांत १९९४ वर्सा जेन्ना तिणें मिस वर्ल्डचो किताब जिखलो तेन्ना बॉलीवूड स्टार ऐश्वर्या राय बच्चनच्या नांवावेल्यान हें नांव दवरलें. तशेंच, खान हांणी ‘अनारकली’, ‘सचिन तेंडुलकार’ आनी प्रधानमंत्री नरेंद्र मोदी हांचीं तशेंच हेर दिग्गजांची नांवांय आंब्यांक दिल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
