भांगरभूंय | प्रतिनिधी
उत्तर भारतांत पावसाक लागून न्हंयांक आयिल्ल्या म्हाहुंवाराक लागून साबार लोकांची जीण उद्ध्वस्त जाल्या. यमुना न्हंयेचो
म्हाकोप कोणाच्या जिवाचेर येतलो हें आतांच सांगपाक जावचें ना तरी नियोजनशून्य उदरगतीचे परिणाम नक्की कसले जावपाक शकतात हाचो फावो तो धडो फकत सुवार्था खातीर राजकारण करपी राजकारण्यांक मेळ्ळा. तातूंत कोणाक उजवो- दावो करपाक मेळचें ना. मागीर ते भाजपवाले, काँग्रेसवाले, आपवाले वा तृणमूल, समाजवादी वो राष्ट्रवाद आसूं. नियोजनबद्ध उदरगती खातीर एकठांय येयात, पूण सारकें काम करात, ना जाल्यार धडगत ना होच संदेश दिल्ली आनी सरसकट उत्तर भारतांतले हुंवार स्थितीन सगल्या पक्षांक दिला. हेच फाटभुंयेर लोकसभा वेंचणूक दोळ्यां सामकार दवरून विरोधकाचें एकवटा खातीर जशे यत्न सुरू आसात तेच भशेन केंद्रांत फाटल्या णव- धा वर्सां सत्तेर आशिल्ल्या भाजपान लेगीत विरोधकांची चाल वळखून सत्ता फुडल्या पांच वर्सांत आपले कडेन कशी उरतली हे खातीर आपले पसून पयस गेल्ल्या जायत्या राजकी पक्षाक उलो मारून एकवटाचे यत्न चालू दवरल्यात.
विरोधकांच्या म्हाएकवट घडोवन हाडपाच्या यत्नांक यश मेळटा ते पळोवन भाजपान ताची भिरांत बाळगिल्या अशी प्रतिक्रिया विरोधी पक्ष फुडारी उक्तावपाक लागल्यात. आतां तांच्या ह्या दाव्यांक कितलें मेरेन तथ्य आसा हे काळूच सांगतलो. मात भाजप लेगीत बेसावध ना हेंच तातूंतल्यान दिसून येता. विरोधक आनी सत्ताधिश्यां कडल्यान सुरू आशिल्ल्या एकवटाच्या यत्नांक खंयची दिका मेळटली हें आयज फाल्यां बंगळुरूंत आनी दिल्लींत जावपी बसका उपरांत स्पश्ट जातलें.
भाजपाक येता ते लोकसभा वेंचणुकेंत भोवमत मेळटलें हाची खात्री आसा. मात साद्या भोवमतार खोशी मानून घेवपाची प्रधानमंत्री नरेंद्र मोदी हांचे टिमीची मानसीक तयारी ना. 2019 प्रमाण दणदणीत भोवमत कशें मेळटलें हे खातीर तांणी व्यूहरचणूक केल्या अशें दिसता. महाराष्ट्रांत राष्ट्रवादी काँग्रेसींत घडोवन हाडिल्ली फूट तशेंच कांय राज्यांत ते दिकेन घाल्लीं पावलां ताची गवाय दितात. हाच्या उरफाटें विरोधकां कडल्यान लोकसभा वेंचणुके पयलीं म्हाएकवट घडोवन हाडपा खातीर नेटाची पावलां घालप चालू आसा. एकवटाचे वाटेर येवपी आडमेळीं तत्वांच्या निकशाचेर घासून पुसून पयस करपाचे तांचे यत्न दिसतात. दिल्ली सरकारान प्रशासकीय सेवा विशयांचे अधिकार काडून घेवपी केंद्रांतल्या सरकाराचो अध्यादेश जारी केले उपरांत आम आदमी पक्षान ताच्या आड सगल्या विरोधी पक्षां कडल्यान तेंको मेळोवपाचो यत्न केलो. मात काँग्रेशीन त्या वेळार तांकां मजत करपाक स्पश्टपणान न्हयकार दिल्ल्यान पाटणा शारांत जाल्ले विरोधकांचे बसके उपरांत विरोधक एक मनान एकठांय येतले अशी आस्त कोणेच बाळगूं नाशिल्ली. मात एकवटा विणे सत्ता मेळोवपाचें सपन प्रत्यक्षांत येवप शक्यूच ना हाची जाणविकाय सगल्यांक आशिल्ल्यान आनी तातूंत आम आदमी पक्ष वांगडा नासत जाल्यार एकवट जालो काय आनी ना जालो काय हाका कांयच अर्थ उरचो नाशिल्ल्यान ह्या पक्षाक वांगडा घेवपा खातीर मात्सो तरी त्याग करचोच पडटलो अशी काँग्रेस पक्षाची भावना जाली आनी तांणी अध्यादेश प्रकरणांत आम आदमी पक्षाक तेंको दिवपाचो निर्णय नाईलाज म्हणून घेतलो.
काँग्रेस पक्षान नाक दाबल्या उपरांत तोंड उगडप हें आम आदमी खातीर अर्थातूच व्हडले जैत आशिल्लें आनी तें मनोवपाक बंगळुरू हांगचे बसकेंत तातूंतले सुवाते बगर हेर खंयचीय सुवात अरविंद केजरीवाल हांचे खातीर जाय तशी नाशिल्ली. आपूण बसकेंत वांटेकार जातलो असें तांणे कळयले उपरांत विरोधकांच्या मार्गांतलें एक व्हडलें आडमेळें पयस जाल्ल्याची भावना जायते विरोधी फुडारी उक्तावपाक लागल्यात. आतां कांय प्रमाणांत हो समज खरो आसलो तरी बंगळुरांत काँग्रेस पक्षाचे येजमानके खाला सुरु आशिल्ले बसकेंत नवें आडमेळें तयार जावचें ना अशें छातयेर हात मारून सांगपाक जावचें ना. राष्ट्रवादी काँग्रेस पक्षातलें सध्याचे घडणुकांचें पडबिंब हे बसकेंत पडपाक शकता. भाजपाक एकाक एक उमेदवार दिवपाचे रणनितीचेर एकमतान निर्णय जावप जितलें म्हत्वाचें आसा तितलेंच निमाणे कोणाच्या फुडारपणा खाला वेंचणूक लडोवपाची हाचोय निर्णय विरोधकांक घेवचो पडटलो. हें दिसता तितलें सोपें ना.
मोदी आडनाव प्रकरणांत नाका मेरेन बुडिल्ल्या राहुल गांधी हांचें प्यादें फुडें काडटले हातूंत आतां कसलोय दुबाव ना. गुजरात उच्च न्यायालयान राहुल गांधी हाका कसलीय थाकाय दिली ना तरी हें प्रकरण सर्वोच्च न्यायालयांत पावलां. राहुल गांधी आनी पर्यायान काँग्रेस पक्षा खातीर सर्वोच्च न्यायालय ही तिसरी आनी निमाणी ‘लायफलायन’ थारची. सर्वोच्च न्यायालयाची लायफलायन राहुल आनी काँग्रेसा खातीर तांचो राजकी फुडार थारोवपी शकता आनी काँग्रेस पक्षाचे सगळे फुडारी राहुलाक थाकाय मेळटली अशी आस्त बाळगून आसात जाल्यार तांतून अजाप तें कसलेंच ना.
कर्नाटकांत वेंचणुकेंत भाजपाक उदक पिवयले उपरांत एक दोन म्हयन्यांत काँग्रेस पक्ष बरोच आक्रमक आनी सक्रीय जाल्ल्याचें दिसून येता. हे फाटभुंयेर सर्वोच्च न्यायालया कडल्यान मोदी आडनांव अवमान प्रकरणांत राहुल गांधी हांका जाय ती थाकाय मेळ्ळी जाल्यार काँग्रेसा खातीर तें नवें बळगें थारतलें आनी भाजपाक लेगीत फुडले वेचणुकेंत काँग्रेस पक्षा कडेन पळोवपाची नदर बदलची पडटली. महाराष्ट्रांत काँग्रेस आतां चवथे सुवाते वयल्यान मुखेल विरोधी पक्ष म्हणून मिरोवपाक लागला. काँग्रेसाक अनुकूल अश्यो जायतो घडणुको घडपाक लागल्ल्यान सत्ताधारी भाजपाक ताचे कडेन आडनदर करपाक मेळचें ना. आनी भाजपा वतीन एकवटा खातीर नव्यान जीं पावलां घालतात तीं पळोवन काँग्रेस नवे उर्बेन आपली पोरणी ताकद दाखोवन दिवपाच्या यत्नांत आसा हाची दखल भाजपान घेतली आसुंये असो अदमास करपाक येता. विरोधी पक्षांक एकठांय येवपाक दिवप ना हे खातीर भाजपान आपणायल्ली रणनिती खूब कितें सांगून वता. आयचे घडयेक 14- 15 पक्ष भाजपा कडेन एकचार सांबाळून आसात आनी विरोधी म्हाएकवटाचेर ताचो कितलो मेरेन परिणाम जावपाक शकता हे रोखडेंच कळटलें. बंगळुरुंतले बसकेक 34- 35 विरोधी पक्ष एकठांय आयिल्ल्याचो दावो करतात तरी हालींच दाखल जाल्ल्या आठ विरोधी पक्षांच्या लोकसभेंतल्या खासदारांचो आंकडो फकत तीन आसा अशें सांगून भाजप वतीन तांचें म्हत्व उणे करपाचो यत्न जाता. भाजप कडेन सध्याचे परिस्थितींत दोन हात करप सोंपें नाशिल्ल्यान एकवट समजीकाये खातीर वेळार व्हडलो त्याग करपाची मनाची तयारी दवरून फुडें सरचें पडटले. विरोधकांच्या एकवटाच्या मार्गात अजून जायतीं विघ्नां येवपाक शकतलीं. तीं हुपून गाडी फुडें वतली काय आडकून पडटली हें लागींच्या फुडाराक पळोवपाक मेळटलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
