भांगरभूंय | प्रतिनिधी
पणजीः 11 दिसांचे खर मेनती उपरांत चोडणा फेरी धक्यार बुडिल्ली ‘बेती’ फेरीबोट काडपाक न्हंय येरादारी खात्याक येस आयलां. ही फेरीबोट आतां दुरुस्ती खातीर खात्याच्या बेतींतल्या वर्कशॉपांत व्हेल्या.
23 जूनाचे राती हे फेरीबोटींत उदक वचून ती बुडिल्ली. खूब दीस जाल्ले ती फेरीबोट भायर काडपाक न्हंय येरादारी खात्याक येस येवंक नाशिल्ले. ही फेरीबोट परतून उदकाचेर उफेवपा खातीर क्रेनी वांगडा हेर गरजेचीं माक्नां तैनात केल्ली आनी तज्ञांची मजत घेवन खर यत्न चलयल्ले.
ही बुडिल्ली फेरीबोट शुक्रारा सकाळीं 10.15 वरांचेर परतून उफेवपाक खात्याक येस आयलें. ही फेरीबोट दुसरे फेरीबोटीक बांदून बेतींतल्या वर्कशॉपांत व्हेली. थंय हे फेरीबोटीची दुरुस्ती जातली आनी जें लुससाण जालां ताचें खोलायेन विश्लेशण जातलें. ही फेरीबोट परतून सेवेंत कार्यरत करचे पयलीं सुरक्षेचे नदरेन तिचो बारीकसाणीन तपासणी करतले, अशें खात्याच्या अधिकाऱ्यान सांगलें. चोडण धक्यार बुडिल्ली फेरीबोट भायर काडपा खातीर ती उदका पोंदां सावन उस्पुपाक सुरवात केल्ली. ह्या कामांत बुडेली उदका पोंदां वचून काम करताले. पूण हे सुवातेर रेबो आशिल्ल्यान म्हेळ्या उदकांत बुडेल्यांक स्पश्ट दिसनासलें. ही फेरीबोट उफेवपाचें काम दोन कंत्राटदारांक दिल्लें. ह्या कामा खातीर आमकां सरकारान तात्वीक मान्यताय दिल्ली. ह्या कामाक सुमार 25 ते 30 लाख रुपया मेरेन खर्च आयला आसतलो, अशी शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
