भांगरभूंय | प्रतिनिधी
राज्यपाल राजेंद्र आर्लेकार : दिवचले ओणम उमेदीन
भांगरभूंय । प्रतिनिधी
दिवचल : देशांत विवीध जाती धर्माचे लोक रावतात. ह्या देशांत एकतेची भावना ही सदांच गरजेची आनी म्हत्वाची आसा. ही भावना फुडें व्हरप गरजेचें आसा. हे एकतेचे भावनेक लागुनूच आयज आमचो भारत देश सर्वश्रेश्ठ जाला. आमची भास, रावपाची पद्दत, खाद्य संस्कृती, परंपरा वेगळी आसली तरीय आमची भारतीय संस्कृती ही एकूच आसा, हाची जाणीव दरेका भारतीयान दवरपाक जाय. गोंयांत रावपी केरळी भावांनीय लेगीत हेच भावनेन गोंयांत जुळोवन घेतलां. हेच खातीर ते सगल्यां कडेन बऱ्यापणान रावतात, अशें केरळचे राज्यपाल राजेंद्र आर्लेकार हांणी सांगलें.
कल्पका कल्चरल असोसिएशना वतीन बोड्ड्यां दिवचलेच्या श्री महामाया देवळाच्या सभाघरांत आयतारा ओणम उत्सव आयोजीत केल्लो. ह्या सुवाळ्यांत राज्यपाल आर्लेकार उलयताले. तांचे वांगडा माचयेर दिवचलचे आमदार डॉ. चंद्रकांत शेट्ये, मयेंचे आमदार प्रेमेंद्र शेट, हळदोणेंचे आमदार कार्लोस फेरेरा, दिवचलचे नगराध्य विजयकुमार नाटेकार, सांखळीची नगराध्यक्ष सिद्धी प्रभू पोरोब, मल्याळम म्हासंघाचे अध्यक्ष वासू नायर, कल्पका कल्चरल असोसिएशनाचे अध्यक्ष शेनोज टी, सचीव पी. व्ही. राजा महाबली हाजीर आशिल्ले.
राज्यपाल आर्लेकार हांणी सांगलें, गोंयची उदरगत, शिक्षणीक, अर्थीक, समाजीक, सांस्कृतीक उदरगतींत योगदान दिवन केरळी लोक एकवटींत रावतात. गोंयची उदरगत ही फक्त गोंयकारांक लागून न्हय जाल्यार खूब जाणांच्या हातांतल्यान जाल्या. फाटलीं 20 वर्सां केरळी लोक गोंयांत रावतात. तांणी गोंयांत केरळी संस्कृतीचो लेगीत सांबाळ केला. आयज ते पुराय तरेन गोंयकार जाल्यात.
केरळी लोक स्वताक गोंयकार मानतात. गोंयच्या दरेका सण उत्सवांत वांटो घेतात, अशें आमदार डॉ. शेट्ये हांणी सांगलें.
भारतांतल्या विवीध प्रांतांतलो लोक एकठांय रावचे हाचे धडे सरदार वल्लभभाई पटेल हांणी दिल्यात. विविधतायेंत एकता आसा. गोंयांत लेगीत खूबश्या राज्यांतले लोक रावतात. गोंयची संस्कृती आनी परंपरे कडेन जुळोवन घेवन एकठांय र वपाचो अणभव केरळी लोक लेगीत घेतात, अशें आमदार शेट हांणी सांगलें.
केरळ आनी गोंयचें लागींचें नातें आसा. केरळची संस्कृती, परंपरा व्हड आसा. ताचें गोंयांत लेगीत दर्शन जाता. सगल्यांक एकठांय हाडून आपल्या राज्याचो सण मनोवपाची संकल्पना उत्कृश्ट आसा, अशें आमदार फेरेरा हांणी सांगलें. दिवली पेटोवन कार्यावळीचें उक्तावण जालें. ह्या वेळार विवीध सर्तींतल्या जैतवंतांक इनामां भेटयलीं. कार्यावळी उपरांत खास केरळी पद्दतीच्या जेवणाचो आस्वाद सगल्यांनी घेतलो. सांजे वेळार विवीध सांस्कृतीक कार्यावळी सादर केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
