भांगरभूंय | प्रतिनिधी
भाजपा विरोधक आनी श्रीराम मंदिराक विरोध करपी राजकी पक्षांक लोकसभेचे वेंचणुकेंत पोशक वातावरण तयार करपाक ‘गोंयकार – एक पावल एकचाराचें’ ह्या मंचाचेर मडगांवां हालींच सभा जाली. ती सर्वधर्मीय एकचारा खातीर नासून फक्त राष्ट्रीय स्वयंसेवक संघ आनी हेर हिंदू संघटनां आड फक्त वीख ओंकपाक घेतिल्ली, हें लोकां सामकार आयलां. आमी सभेंतल्या सगल्या हिंदू विरोधी वक्तव्यांचो खर निशेध करतात.
मायभास राखणेच्या आनी चर्चीच्या इंग्लीश शाळांक अनुदान दिवपाच्या प्रस्नाचेर गोंयांतले असंख्य संघ वावुरपी गोंयच्या रा. स्व. संघाचे यंत्रणे भायर पडून ‘भारतमाता की जय संघ’ हे संघटनेचें काम करतात, तरी आमी संघ स्वयंसेवकत्व, संघाचे विचार, तत्वज्ञान सोडूंक ना. समान भगवो बावटो, आचारपद्दत आनी तीच प्रार्थना घेवन आमी काम करतात. ताका लागून हिंदू संघटनांचेर देशद्रोहाचे आरोप करपी ‘एक पावल एकचाराचें’ च्या एकचार इबाडपी यत्नांचो आमी परत एकदा धिक्कार करतात.
काँग्रेस सरकारान संविधानांत 92 फावटी तांकां गरजेचे दिसले ते बदल केल्यात. इंदिरा गांधीन स्वताचें कदेल तिगोवपाक सगलो देश बंदखण करून लादिल्ले आणीबाणींत, सगले विरोधक बंदखणींत आसतना संसदेंत कसलीच चर्चा घडोवन हाडिनासतना संविधानांत ‘धर्मनिरपेक्ष आनी समाजवादी’ हीं उतरां घुसयिल्लीं, हें एकचारवाले विसरले? काँग्रेसीन सुप्रीम कोर्टांत ‘रामायण’ हें सत्य न्हय, तर तें थोतांड अशें प्रतिज्ञापत्र दिवन पसून श्रीरामाचें मंदिर अयोध्येंत मूळ जाग्यार स्थापन करपी सरकार लोकांच्या तेंक्याक लागून सत्तेर आयलेंच मूं? धर्माच्या आदाराचेर देश तोडून मुसलमानां खातीर पाकिस्तानाक दिलो, उरिल्लो वाठार, त्याच निकशांचेर सभाविकपणान हिंदूराष्ट्र म्हूण घोशीत जावचो, अशी हिंदूंची भावना आसली जाल्यार तो ‘देशद्रोह’ थारता, हें थारावपी तुमी कोण? लोकभावना जैतिवंत जाली आनी संविधाना वरवीं ‘हिंदूराष्ट्र’ घोशीत जालें तरी लोकशायेंत तें कायदेशीर थारचें ना, अशें तर ‘एकचारा’चें म्हणणें ना मूं? ही सभा मडगांवां जाली आनी ‘मडगांवकारांनी’ जातीय एकचार इबाडपाक जणू हिंदूच जापसालदार आसात, असो निर्देश सभेक दिलो.
फातोड्ड्यां ‘पाॅप्युलर फ्रंट ऑफ इंडिया’ ह्या केंद्र सरकारान बंदी घाल्ले जिहादी संघटनेची राजकी शाखा ‘एस.डी.पी.ओ.’ ह्या पक्षाची स्थापना करपाक जमिल्ल्या अडिच हजार मुस्लिमांनी दिल्ल्यो ‘पाकिस्तान जिंदाबाद’ च्यो घोषणा आनी भर मडगांवां राममंदिर मोडून परत बाबरी बांदूं, ह्या आशयाचे पोस्टर सगल्याक लागिल्ले, खुद्द मडगांवां ‘पाकिस्तान जिंदाबाद’चे दिल्ले नारे ‘एकचारवाल्यां’क आयकपाक आयले नात? पाॅप्युलर फ्रंटाच्या शेका खाला रुमडामळ पंचायतींत चलिल्ली दादागिरी जातीय एकचार कसो इबाडटा हें एकचारवाल्यांक खबर ना?
गोंय मुक्ती दिसा सुकुर मेंदीश हो धर्मगुरू पुर्तुगेजधार्जिणें भाशण दिता, राशोल सेमिनारीचो रेक्टर फादर व्हिक्टर फेर्रांव, ‘पुर्तुगीज आयिल्ले तेन्ना गोंयांत हिंदू नाशिल्लेच; पुर्तुगीजांनी मोडिल्लीं देवळां हिंदूंची नाशिल्लीं, तीं हेर पंथांचीं आशिल्लीं’, असो फटीचो इतिहास सांगता, गोंयकार जांकां आराध्य दैवत मानता अशा छत्रपती शिवरायांचो अपमान फादर बोल्मॅक्स भर चर्चीच्या आल्तारार शेर्मांव दितना करता. आनीकूय घडणुको आसात. ह्यो घडणुको ‘अराष्ट्रीय’ सदरांत येतात. तांची सरमिसळ जातीय एकचारा कडेन मुद्दाम कित्याक घालतात? सगलो हिंदू, ख्रिस्ती वा मुस्लिम समाज हाका जापसालदार नासता. जातीय एकचार इबाडपाचो प्रस्न ताका लागून येताच खंय? अराष्ट्रीय कृत्यांक मागीर ती खंयच्या धर्मिया कडल्यान जावं, ताका विरोध जावपाकूच जाय. ताचेर प्रतिक्रिया ही येतलीच. खरें म्हणल्यार सगल्या धर्माच्या लोकांनी ह्या कृत्याचो विरोध करपाक जाय. ते तो करीनात. पूण, प्रतिक्रिया दिवपीच जातीय एकचार इबाडटात, अशें एकचारवाल्यांचें म्हणणें दिसता?
हिंदू समाजाक लक्ष्य करून ताचेर ‘राजकारण- प्रभावी’ माचयेर ताळयो मेळोवपाक उठसूट टिका करप बंद करात आतां. खूब जालें!
सुभाष भास्कर वेलिंगकार
संस्थापक मार्गदर्शक,
भारतमाता की जय संघ, गोंय
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
