भांगरभूंय | प्रतिनिधी
असल्यो घडणुको देशाक चार पावलां फाटी ओडटात, हाची जाणीव सगल्यांनीच दवरपाक जाय.
नाताळा निमतान प्रधानमंत्री नरेंद्र मोदी दिल्लींतले इगर्जेंत गेले. प्रार्थनासभेंतूय वांटो घेतलो. हो व्हिडियो व्हायरल जाला. कारण तांचेर फक्त हिंदूंचेच फुडारी अशी म्होर बसल्या. कांय विरोधक तशी टिका करतात. भेटी फाटल्यान राजकी डावपेच आसूं येतात. पूण, तोच दुबाव कित्याक घेवचो? इगर्जेंत वचपाची ही कितें तांची पयलीच खेप न्हय. हाचे आदींय ते गेल्यात. आपल्या मंत्र्याच्या घरांत पसून तांणी नाताळ मनयला. अल्पसंख्याकांचेर जावपी हल्ल्यांचे फांटभुंयेर ही भेट चड म्हत्वाची थारता. क्रिस्तांवांचे कार्यावळींक आडमेळीं हाडपाचेय प्रकार नातलांच्या समयार जाले. ‘सगल्यांक शांती, करूणा आनी आशेन भरिल्ल्या नातलांची परबीं. येशू क्रिस्ताची शिकवण समाजांत एकचार, भावपण निर्माण करूं,’ असो संदेश मोदी हांणी नाताळ मनयतना दिलो. मात हे घडणुके वेळारूच छत्तीसगढांतल्या रायपूर शारांत एका माॅलांत 50 वयर मास्क लायिल्ल्या लोकांचो चोंबो घुसलो आनी तांणी क्रिसमसा निमतान केल्ली लाखांनी रुपयांची सजावट फोडून उडयली. धर्मांतरा आड आयोजीत केल्ल्या बंदां वेळार माॅल बंद दवरूंक ना, म्हूण तांणी ही कृती केली खंय. मात पुलिसांनी, प्रशासनान अजून तांचेर कांयच कारवाय करूंक ना. ह्या माॅलांत नातलां मनोवपाक आयिल्ल्या लोकांक जीव मुठींत घेवन घरा वच्चें पडलें.
दुसरो प्रसंग उत्तर प्रदेशांतलो. एका व्हिडियोंत कपलाक भगवो उबो नाम लायिल्लो तरणाटो चर्चींत वचून धर्मगुरूक धमकायतना, क्रिस्तांव सेवां विशीं, संतां विशीं आक्षेपार्ह उलयतना दिसता. मंत्र म्हणून मागीर जय श्रीराम अशी घोशणा दिता. ह्या तरणाट्या आडूय कारवाय जावंक ना. तो मूळ बांगलादेशाचो. नांव सनिऊर रेहमान. तो आतां हिंदू जाला. नांव सत्यनिश्ठ आर्य. बंगळुरूंत ताचे आड कागाळ जाल्या. मात, तो कर्नाटकांतलो न्हय, अशें म्हणीत पुलीस ओगी बसल्यात.
भारतीय संविधाना प्रमाण, दरेकल्याक ताचे उपासना पद्दती प्रमाण प्रार्थना करपाक मेळटा, सभा, धर्मीक कार्यां करपाक आडमेळीं नात. मात, दुसऱ्याचो धर्म कसो दुय्यम तें सांगप, टिका, टिंगल करप, धर्मीक भावना भडकावपी भाशणां दिवन, हें कायद्यांत बसना. मात कोण प्रतिक्रिया दिनात. धर्मीक कार्यावळींत घुसून उपस्थितांची श्रद्धा दुखोवप, दोन गटांत तणाव निर्माण करप हें टाळपाक जाय. मात हालींच्या वर्सांनी तें खूबच वाडलां. आमी समाजीक एकचार तिगोवन दवरपाक जाय. प्रधानमंत्री मोदी समाजांत तणाव निर्माण जावंक जायना म्हूण स्वता यत्न करतात, चर्चींत वचपा सारकी कृती करतात, येशूचे शिकवणेची जाहीर तुस्त करतात. ती समाजांत एकचार हाडूं, अशें सांगतात आनी हेवटेन कडव्या संघटणांचे वावुरपी कायदो हातांत घेतात, हाका कितें म्हणपाचें? संवसारांतली व्हडली लोकशाय आशिल्लो, सगल्या धर्मांक आसपावन घेवपी आमचो देश मुखार वचत आसा, मात रायपूर, उत्तर प्रदेशांतल्यो घडणुको देशाक चार पावलां फाटीं ओडटात, हाची जाणीव सगल्यांनीच दवरपाक जाय. संविधान सगल्या धर्मांची समता, सहअस्तित्व मानता. धर्मीक सहिष्णुतेक धक्को दिवपी घडणुको ताका लजेक घालता. जातीय, धर्मीक नदरेन घडपी दरेक घडणूक केंद्र सरकाराक खत लायता, बदनाम करता, हें ह्या आंदोलकांनी विसरूंक जायना. भितरल्यान कोणायची फूस आसली तरी आंतरराष्ट्रीय समुदाया मुखार देश, सरकारूय कोणाचे तरी चुकीक लागून टिकेचे भकीक पडटा, हें अपुरबुद्द आंदोलकांक सांगतलो कोण?
रायपूरांतल्या आंदोलकांनी माॅलांतल्या लोकांक तुमी हिंदू काय क्रिस्तांव, तुमची जात खंयची, अशे प्रस्न विचारिल्ल्याचो दावो माॅल वेवस्थापनान केला. सीसीटीव्ही कॅमेऱ्यांत हो हिंसाचार पळोवंक मेळटा. थोड्यांची वळखपत्रांय तपासलीं. काश्मीरांत आतंकवाद्यांनी धर्म विचारून पर्यटकांक मारिल्ले. तसलोच हो प्रकार न्हय मूं? क्रिया, प्रतिक्रियांचें हें सूड नाट्य समाजाक खंय घेवन वतलें, तेंच कळना. धर्म, विचारसरणी विचारांत घेनासतना पुलिसांनी कायदो हातांत घेवप्यांक तांचो जागो दाखोवपाक जाय. जायत तांकां हें धाडस?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
