भांगरभूंय | प्रतिनिधी
पणजी : एआय खुलाक तुमी जितल्या तपशिलाचेर म्हायती दितले तशे तुमकां बरे परिणाम मेळटले. एआय हें एखाद्या हारश्या प्रमाण काम करीत आसता. तातूंत तुमच्या ज्ञानाचे प्रतिबिंब दिसतूच आसता अशें मत मल्याळी चित्रपट दिग्दर्शक शंकर रामकृष्णन हांणी उक्तायलें. मंगळारा इफ्फींत मास्टरक्लास विभागांत ते उलयतालेे. ह्या वेळार एआय चित्रपट निर्माते व्ही. मुरलीधरन आनी दिग्दर्शक शेखर कपूर हाजीर आशिल्ले. ताचे पयलीं महोत्सवांतल्या एआय विभागांत निवडिल्ल्या चित्रपटांचें प्रदर्शन केलें.
शंकर हांणी म्हणलें, एआय तंत्रज्ञान नेटान बदलता. दर दोन सप्तकाक हातूंत नवीन भर पडटा. सध्या एआय तंत्रज्ञानान चित्रपट करपाक कांय मर्यादा आसात. एआयकडल्यान नेमकें कितें जाय हें ताका सांगल्यार काम नक्की बरें जाता.
फुडाराक एआय वरवीं करपी काम अदीक सुरळीत जातलें. सध्या फुकट एआय टूल वापरून साधारपणान ८ सेकंदाचें बरो शॉट मेळटा. वेवसायीक दर्जाचें टूल वापरून हो शॉट आनीक चड काळा खातीर वाडोवपाक मेळटा. एआयचो वापर करून शिक्षणीक चित्रपट करपाचो आमचो विचार आसा.
व्ही मुरलीधरन हांणी, एआय चित्रपटांत तुमकां लोकेशनार वचून शूट करपाची गरज ना.
हाका लागून ही पद्घत खूब फायद्याचें थारता. एआयचो वापर करून आमी २ मिनटांचो लघुपट तयार केला. हातूंत सुरवातेक कांय आडमेळीं आयलीं तरी उपरांत हातूंत काम करप सोपें जालें. सध्या भारतीय चित्रपट मळा खातीर गरजेचें आशिल्लें एआय मोड्युल उपलब्ध जरी नासलें तरी फुडाराक ते जातलें. मात ताचो वापर करतना कॉपीरायट वा इंटेलेक्चुअल प्रॉपर्टी कायद्याचो भंग जावचो ना हाची काळजी घेवपाक जाय.
खंयचेंय नवें तंत्रज्ञान आयलें काय हाका लागून लोकांच्यो नोकर्यो वतल्यो असो भंय निर्माण जाल्लो. संगणक आयलो तेन्नाय अशेंच दिसतालें. मात ताचे उपरांत संगणकाचो आदार घेवन नवी रोजगार निर्मिती जाली. फुडाराक लोक एआयच्या तंत्रज्ञानाचो अभ्यास करून ताचे वरवीं निर्माण जावपी रोजगार संदी घेतील अशें मत शेखर कपूर हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
