भांगरभूंय | प्रतिनिधी
पणजी: एआय टुलाक तुमी जितले तपशिलान म्हायती दितले तेच प्रमाण तुमकां बरे परिणाम मेळटले. एआय हें एखाद्या हारशा प्रमाण काम करीत आसतात. तातूंत तुमच्या ज्ञानाचें प्रतिबींब दिसत आसता अशें मत मल्याळी चित्रपट दिग्दर्शक शंकर रामकृष्णन हांणी उक्तायलें. मंगळारा इफ्फीतल्या मास्टरक्लास विभागांत ते उलयताले.
ह्या वेळार एआय चित्रपट निर्माते व्ही. मुरलीधरन आनी दिग्दर्शक शेखर कपूर हाजीर आशिल्ले. ताचे पयलीं महोत्सवांत एआय विभागांत वेंचिल्ल्या चित्रपटांचें प्रदर्शन केलें.
शंकर हांणी मुखार उलयतना म्हणलें, एआय तंत्रज्ञान सेगीत बदलत आसता. दर दोन सप्तकांत हातूंत नवे नवे भर पडत आसतात. सद्या एआय तंत्रज्ञानाचे चित्रपट तयार करपाक कांय मर्यादा आसात. एआय कडल्यान नेमकें कितें जाय हें ताका सांगल्यार काम नक्कीच बरें जाता.
फुडारांत एआय वरवीं केल्लें काम आनीक सुलभतायेन जातलें. सद्या विनामुल्य एआय टूल वापरून सादारणपणान 8 सेकंदाचे बरें दृश्य (शॉट) मेळटा. वेवसायीक दर्जाचें टूल वापरून हें दृश्य आनीक चड काळा खातीर वाडोवं येता. एआयचो वापर करून शिक्षणीक चित्रपट तयार करपाचो आमचो विचार आसा अशें शंकर हांणी म्हणलें.
व्ही मुरलीधरन हांणी म्हणलें, एआय चित्रपटांत तुमकां लोकेशनाचेर वचून चित्रिकरण करपाची गरज ना. हाका लागून ही पद्दत खूब फायदेशीर थारता. एआयचो वापर करून आमी 2 मिणटांचो लघुपट तयार केलो. हातूंत सुरवातेक कांय अडचणी आयल्यो तरी उपरांत हातूंत काम करप सोंपें जालें.
सद्या भारतीय सिनेमळार गरजेचें आशिल्लें एआय मोड्यूल उपलब्ध नासलें तरी फुडारांत तें जातलें. पूण ताचो वापर करतना कॉपिरायट वा इंटेलेक्चुअल प्रॉपर्टी भंग जावची ना हाची जतनाय घेवंक जाय.
खंयचेंय नवें तंत्रज्ञान आयले उपरांत लोकांच्यो नोकऱ्यो वतल्यो अशी भिरांत निर्माण जाल्ली. संगणक आयले उपरांत लेगीत अशेंच जाल्लें. पूण उपरांत संगणकाराचो आदार घेवन नवी रोजगार निर्मिती जाली. फुडारांत लोक एआयच्या तंत्रज्ञानाचो अभ्यास करून ताचे वरवीं निर्माण जावपी रोजगार संदीचो लाव घेतले अशें मत शेखर कपूर हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
