भांगरभूंय | प्रतिनिधी
धजा मारपी, त्रोसां, फकांडां करपी व्हिडियो वा हेर मजकूर सोशल मिडियाचेर घालप हो गुन्यांव.
बेब्यांचेर गुंडे मारपी भुरग्यांक दिसता मजा, पूण बाबड्या बेब्यांक ती सजा… सोशल मिडियाचेर बोगस व्हिडियो करप्यांचेंय अशेंच. मजा म्हणून ते व्हिडियो तयार करतात आनी ताचो त्रास जाता भावार्थी मनशांक. भारतांत रोखडोच विस्वास दवरपी लोकांचो आंकडो करोडांच्या घरांत आसा. ताकाच लागून सोशल मिडियाचेर बोगस पोस्ट, लेख, व्हिडियो घालपी दिसानदीस वाडत आसात. कोणायचीय दिशाभूल केली जाल्यार ताचे कितें परिणाम जावंक शकतात, हाची जाणीव ह्या कलाकारांक (?) नासता. थोडे फक्त मजा म्हूण हें करतात, पूण कांय जाण आसुरी आनंद मेळचो वा आपल्या मनशांक फायदो मेळचो म्हूण. सायबर पुलिसांनी असल्यांक ख्यास्त दिवंक जाय.
गोंयांत सध्या बिबटे भोंवतात. ते केन्ना खंय येत तें कोणूच सांगपाक शकनात. बिबटे, हती एके रातीन जाय जाल्यार 25 किलोमिटर अंतर चलपाक शकतात. फातोड्ड्यां आमदार विजय सरदेसाय हांच्या घरा लागसारच्या वाठारांत बिबटो भोंवता असो एक फोटो पयर व्हायरल जालो. चवकशे उपरांत मूळ उत्तरप्रदेशांतल्या एका तरणाट्यान फक्त मजे खातीर तो घाल्ल्याचें कळ्ळें. बिबटो आयला हाची कसलीच खूण सांपडूंक नाशिल्ल्याचें रानां अधिकाऱ्यांनी सांगलें. पुलिसांनी त्या तरणाट्याचो मोबायल फोन जप्त केला. एकल्याक बुद्द घडटकच हेरांनी शाणें जावपाचें आसता, मात कांय जाण कितलेंय सांगून सुदरनात. हालींच पेंच अभयारण्यांत एक मनीस सोऱ्याची बाटली वागाच्या तोंडाक लायता, ताका पोशेता असो व्हिडियो व्हायरल जाल्लो. उपरांत एक वाग मनशाक उखलून व्हरता आनी उपरात दुसरे दिसा (दुसऱ्या व्हिडियोंत) परत हाडून आशिल्लो थंय सोडटा असो व्हिडियो गाजतालो. तो बोगस हें खबर आसतना हजारांनी लोकांक ती घडणूक खरीच अशें समजून प्रतिक्रिया दिल्ल्याचें दिसता. पयलो खरो कसो दिसपी व्हिडियोय बोगस हें स्पश्ट जालां. कोणे असलें सोशल मिडियाचेर घालपाक जायना. घालेंच जाल्यार तें एआय वापरून केलां, हें सांगपाक जाय. कोणाची धजा मारपी, त्रोसां मारपी व्हिडियो वा हेर मजकूर सोशल मिडियाचेर घालप हो गुन्यांव. तरीय बरेचजाण तो करतात. आतां एआय साॅफ्टवेरांक लागून सगलेच कितें ना कितें करामती करतात. पळयना फुडें विस्वास बसतलो, असलो कंटेट थोडे घालतात आनी लोकांची दिशाभूल करतात. हाचो एक वायट परिणाम म्हणल्यार बऱ्याच लोकांचो खऱ्या व्हिडियों वयलो विस्वास उडला.
लोक तिडकल्यार हिंसा जावं येता, हाचो विचार दरेका नेटिझनान करपाक जाय. गैरसमज पातळूं येतात, जे समाजा खातीर घातक थारुं येतात. एआयचो वापर सकारात्मकताय, सर्जनशील कामां करपाक जावंक जाय, न्हय गुन्यांवकारी विचार पातळावपाक. बिबटो भोंवता असो व्हिडियो व्हायरल जाल्यार थळाव्या लोकां मदीं भिरांत पातळू येता. तांचे भलायकेचेर परिणाम जावं येता. चुकीची, दिशाभूल करपी म्हायती दिवप वायट. बोगस व्हिडियोंक लागून वेवसायाचें लुकसाण जावं येता. सायबर पुलिसांनी हें गंभीरपणान घेवपाक जाय. सायबर जाणकारांनीय भौसाक मार्गदर्शन करुंक फावो. दुबावीत व्हिडियो शॅर करपाचो मोह टाळप बरें. एआय वापरून तयार केल्ले व्हिडियो कळटात. मनीस थ्री डी चित्रा सारको दिसता. दोळ्यांची सैमिक हालचाल जायना. सावळी दिसताच अशें ना. आवाज (लिप सिंक), जुळनात. हालचाली कृत्रिम दिसतात. मूळ फोटो गुगलाचेर रिव्हर्स इमेज सर्च करून सोदूं येता. फॅक्ट चेक करपी शेंकड्यांनी वेबसायटी आसात, त्यो पळोवं येतात. ह्या व्हिडियोंचो मेटाडेटा तपासपाक जाय. म्हणल्यार तो कोणे केला, केन्ना अपलोड जाला, खंयच्यान शॅर जाला, कॅप्शन आनी हेर म्हायती. वादग्रस्त आसल्यार पुलिसांकूय म्हायती दिवप गरजेचें. एआयचो चुकीचो वापर करपीच चड आसात. हें फुडाराक घातक थारूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
