भांगरभूंय | प्रतिनिधी
डीजीसीए कडल्यान एअर इंडियाक कारणा दाखया नोटीस जारी
नवी दिल्ली, खबरां संस्था ः दिल्ली सावन सॅन फ्रांसिस्कोक वचपी एअर इंडिया विमानाची येरादारी 30 वरां उसरां जाल्ल्यान 200 परस चड प्रवाशांचे हाल जाले. तंत्रीक इबाड, काम न करपी वातानुकूलन यंत्रणा आनी पेलोडाच्या समस्याक लागून हो कळाव जाला अशें सांगलां.
हे फाटभुंयेर शुक्रारा सकाळीं नागरी विमान येरादारी महासंचालकान (डीजीसीए) एअर इंडिया विमानांक जावपी कळाव आनी प्रवाशांची जतनाय घेवंक उपेस आयिल्ल्यान हें संबंदी कारण दाखोवपाची नोटीस जारी केली. एअर इंडियान हें विशीं अजून कसलीच म्हायती दिवंक ना.
पूर्वनियोजीत वेळापत्रका प्रमाण बिरेस्तारा दनपारां 3.30 वरांचेर विमान उड्डाण करपाचे आशिल्लें. पूण ताका स वरां कळाव जाल्ल्यान ताचे उड्डाण शुक्रारा जातलें अशें सांगलें. शुक्रारा हें बोईंग 777 विमान सकाळीं 11 वरांचेर उड्डाण करपाचें आशिल्लें. पूण तातूंतय बदल करून ताचो वेळ दनपारां 3 वरांचेर थारायलो. ताकाय आनीक कळाव जालो आनी सांजवेळा 5.45 वरांचेर विमान उड्डाण जातलें अशें सांगलें. पूण ते उपरांत लेगीत विमानाचे उड्डाण जालेच ना अशीं सूत्रांनी म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
