एअर इंडिया नव्या रंगांत, नव्या रुपांत
भांगरभूंय | प्रतिनिधी
मुंबय : एअर इंडिया हे विमान कंपनीचो सध्या ‘रिब्रँडिंग इव्हेंट’ सुरु आसा. हे कार्यावळींत कंपनींत एक म्हत्वाचो बदल केला. सध्या एअर इंडियाचो लोगो आशिल्ल्या महाराजा शुभंकर हांचे वयलो कामाचो ताण उणो करपाचो निर्णय कंपनीन घेतला. महाराजा शुभंकर हो एअर इंडियाच्या प्रिमियम क्लासींत आनी विमानतळाच्या लाँजांत आसतलो. पिळदार मिशयो, टोकदार नाक आनी पगडी घालून एअर इंडियाचो हो शुभंकर महाराज फाटल्या 77 वर्सां सावन एअर इंडियाच्या प्रवाशांची सेवा करता.
कसो दिसता नवो लोगो?
एअर इंडियाच्या ह्या नव्या लोगोंत शुभंकर महाराजाक विसव दिला. हातूंत तांबडो, धवो आनी जांबळो अश्या तीन रंगांचो आसपाव आसा. तशेंच तांबडो आनी धव्या रंगांत एअर इंडिया हीं अक्षरां घाल्यांत. तशेंच जांबळो रंग एअर विस्तारांतल्यान घेतिल्ल्याचें सांगतात. एअर इंडिया ही कंपनी टाटा समुहाची.
ह्या वर्साचे सुरवातेक एअर इंडियाचे मुखेल कार्यकारी अधिकारी कॅम्पबेल विल्सन हांणी एअर इंडियांत खुबशे बदल जातले, अशें म्हणिल्लें. ह्या बदलाचोच एक भाग म्हणून एअर इंडियाच्या लोगोंत कांय बदल जाल्यात. जानेवारी 2022 त एअर इंडियाचो धनी परतून टाटा समूह जालो. एअर इंडियाच्या आदल्या लोगोंत केसरी कोणार्क चक्रा वांगडा एक तांबड्या रंगाचो हंसूय आसा. पूण आतां हें चक्र आनी हो हंस दोनूय गायब जातले.
टाटा सन्सान एअर इंडिया खातीर सगळ्यांत चड बोली लावन ही कंपनी ताब्यांत घेतिल्ली. रिणांत बुडिल्ली एअर इंडिया कंपनी टाटान सगळ्यांत चड बोली लावन विकती घेतली. टाटाच्या ताब्यांत ही कंपनी गेल्या उपरांत हातूंत खुबशे म्हत्वाचे बदल केले. ताका लागून आतां एअर इंडियांत जाल्लो बदल ही कंपनींतल्या बदलांचो एक भाग. एअर इंडियाची ही कार्यावळ नव्या युगाची नांदी आसतली, अशें कंपनी सांगता. ताका लागून ह्या बदलां सयत आनी खंयचे बदल कंपनींत जातात, हें पळोवप म्हत्वाचें थारतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
