भांगरभूंय | प्रतिनिधी
टोरंटो: कॅनडाच्या व्हँकुव्हरच्यान दिल्लीक वचपी एअर इंडिया विमानाच्या पायलटाक विमानांतल्यान देंवयलो. पायलटाचेर सोरो पिवपाचो आरोप आशिल्लो. ही घडणूक २३ डिसेंबराक घडिल्ली, तेन्ना एअर इंडिया विमान एआय१८६ उड्डाण जावपाचें आशिल्लें. त्या वेळार व्हँकुव्हर विमानतळार एका कर्मचार्यान पायलटाक सोरो पियेतना पळयलो.
उपरांत कर्मचार्यान अधिकार्यांक कागाळ केली. पायलटा कडेन चवकशी करपाक कॅनडाचे अधिकारी पावले तेन्ना तांकां सोर्याचो वास आयलो. उपरांत पायलटाची ब्रेथ एनालायझर चांचणी दिली. जातूंत तो अपेशी थारलो.
सुरक्षेच्या नेमां प्रमाण विमान उड्डाण करपा खातीर आनीक एक पायलट रोस्टरांत जोडला अशें विमान कंपनीच्या प्रवक्त्यान सांगलें. उपरांत तो विमान घेवन दिल्लीक गेलो. विमानाक सुमार २ वरां कळाव जालो.
कॅनडान ड्युटी पयलीं पायलटच्या सोरो पिवपाच्या प्रकरणांत एअर इंडिया वतीन स्पश्टीकरण मागयलां. हें प्रकरण २३ डिसेंबर, २०२५ चें. रॉयल कॅनेडियन मावंटेड पुलीसचे कागाळीवेल्यान कॅनडाच्या एव्हिएशन अथॉरिटी, ट्रान्सपोर्ट कॅनडान २४ डिसेंबर २०२५ दिसा एअरलायनीक पत्र बरयलें.
कॅनडान मागली जाप
ट्रान्सपोर्ट कॅनडान हाका गंभीर सुरक्षा प्रकरण म्हणीत चवकशेची मागणी केली. ट्रान्सपोर्ट कॅनडान एअर इंडियाक सांगलें, ही घडणूक कॅनेडियन एव्हिएशन रेग्युलेशन्सचे नेम मोडपी आसा. हातूंत CARs 602.02 आनी 602.023 सोबतच एअर इंडियाच्या फॉरेन एअर ऑपरेटर सर्टिफिकेटच्यो अटी मोडल्यात.
कॅनेडियेन एव्हिएशन अथॉरिटीन सांगलें, RCMP आनी ट्रान्सपोर्ट कॅनडा सिव्हिल एव्हिएशन (TCCA) वतीन अंमलबजावणीची कारवाय करपाक शकता. विभागान भारतीय एअरलायन कंपनीक गरजेचीं पावलां उबारपाक आनी २६ जानेवारी मेरेन चवकशेचे निश्कर्श आनी कारवायेची म्हायती दिवपाक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
