भांगरभूंय | प्रतिनिधी
पणजी: एअर इंडियान गोंय आनी लंडन-गॅटवीक मजगतींची सरळ विमानसेवा परत एक फावट रद्द केल्या. ह्यान पयलीं ही सेवा २६ ऑक्टोबर सावन परत सुरू जावपाची आशिल्ली आनी ते खातीर बुकींगूय सुरू केल्लें. मात आतां हें बुकींग आडायलां. हाका लागून गोंयच्या पर्यटन उद्देगाक धक्को बसला. म्हणून प्रवाशांचीय व्हड प्रमाणांत गैरवेवस्था जातली.
एअर इंडियान आपल्या शिंयांतल्या (२०२५-२६) वेळापत्रकांतल्यान गोंयांक भायर मारलां. तातूंत लंडन-गॅटवीका खातीर अमृतसर आनी अहमदाबादची विमानसेवा कायम दवरल्या. सुत्रां प्रमाण, अहमदाबादांत जाल्ल्या विमान अपघाता उपरांत एअर इंडियान आंतरराष्ट्रीय मार्गांवेल्या व्हड विमानांच्या आंकड्यांत १५% कपात केल्या. हाचो फटको गोवा-लंडन मार्गाक बशिल्ल्याचें दिसता.
या निर्णया फाटल्यान वेवसायीक कारणांय आशिल्ल्याचें सांगतात. एअर इंडियान ज्या मार्गांचेर वर्सभर सेगीत बरी मागणी केली, अशा मार्गांक प्राधान्य दिलां. अमृतसर आनी अहमदाबादच्यान इश्ट, कुटुंबीयांक मेळपाक वचपी प्रवाशांचो आंकडो चड आसता. हाचे बदला, गोंयच्या पर्यटन हंगामा प्रमाण मागणी उणी-चड जाता. हाका लागून, फायद्याक प्राधान्य दिवन एअर इंडियान हो निर्णय घेतिल्ल्याचें मानतात.
ह्यान पयलीं, गोंय-लंडन विमानसेवा जुनांत बंद केल्ली. उपरांत गोंयचे मुख्यमंत्री प्रमोद सावंत आनी खासदार सदानंद तानवडे हांणी केंद्रीय हवाई येरादारी मंत्री राम मोहन नायडू हांकां पत्र बरोवन ही सेवा परत सुरू करपाची मागणी केल्ली. खुबशे गोंयचे नागरीक नोकरी निमतान वा हेर कामां खातीर लंडनाक यो-वच करतात, हाका लागून ही सेवा म्हत्त्वाची आशिल्ल्याचें तांणी नमूद केल्लें. मात, आतां एअर इंडियाच्या ताज्या निर्णयाक लागून प्रवाशी परत उबगल्यात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
