भांगरभूंय | प्रतिनिधी
हरियाणा, खबरां संस्था: पंजाब सरकारान ऍसीड हल्लो पिडेस्त दादल्यां खातीरूय दर म्हयन्याक ८००० रुपया भत्ता दितले अशें म्हणलां. पंजाब आनी हरियाणा उच्च न्यायालयांत पंजाब सरकारान हो निर्णय एके सुनावणे मजगतीं घेतला. सुनावणी ऍसीड हल्लो पिडेस्त मलकीत सिंह हांचे याचिकेची चालू आशिल्ली. भत्तो मेळोवपा खातीर मलकीत सिंह बरेच यत्न करतालो. तांकां भत्तो मेळूंक ना. हाका लागून तांणी उच्च न्यायालयांत याचिका दाखल केली.
ऍसीड हल्लो दादल्यांचेरूय जाता
मलकीत सिंहांनी उच्च न्यायालयांत म्हणलें, २०१७क पंजाब सरकारान ऍसीड हल्लो पिडेस्तां खातीर तरतुदी केल्ल्यो,मात त्यो फकत बायलां खातीरूच जाल्ल्यो. ऍसीड हल्ले फकत बायलांचेरूच जायनात दादल्यांचेरूय जातात. जसो म्हजेर जालो. ह्या हल्ल्यांत म्हजे दोनूय दोळे गेले. तेन्नाच्यान हांव काम करपाक शकना.
सुनावणे उपरांत कोर्टांत पंजाब सरकारान पिडेस्त दादल्यांचो भत्तो सुरू केल्ल्याची खात्री दिली आनी दिल्ल्या चेकाची पावतीय कोर्टांत जमा केली. दर म्हयन्याक ८०००.रु. ऍसीड हल्लो पिडेस्त दादल्याक दिवपाचो निर्णय घेतलो. मलकीत सिंहं हो पयलो ऍसीड हल्लो पिडेस्त भत्तो मेळपी दादलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
