भांगरभूंय | प्रतिनिधी
बंगळुरू, खबरां संस्था ः ऍमेझॉन ही नामनेची कंपनी, जी आपल्या सेवां खातीर फामाद आसा. पूण बेंगळुरूंत रावपी एका जोडप्याक भिरांकूळ अणभव आयला. तांकां ऍमेझॉन पार्सल मेळ्ळें आनी तातूंतल्यान जिवो सोरोप भायर सरलो. पार्सल ऑर्डर केल्लें हें जोडपें सॉफ्टवेअर इंजिनियर आसात. तांणी एक्स बॉक्स कंट्रोलर ऑनलायन ऑर्डर केल्लो. पूण तांचो बॉक्स आयलो तेन्ना तातूंतल्यान सोरोप भायर सरलो.
जोडप्यान तयार केलो व्हिडियो
ह्या धक्को दिवपी घडणुके उपरांत बंगळुरूच्या ह्या सॉफ्टवेअर इंजिनियर जोडप्यान हे विशीं व्हिडियो घालो. तातूंत तांणी म्हणलां, आमी एॅमेझॉना वयल्यान एक्सबॉक्स कंट्रोलर ऑर्डर केल्लो. त्या बॉक्सांत एक सोरोप आशिल्लो. तोय विखारी नाग. अमेझॉनाच्या डिलिव्हरी बॉयन हो बॉक्स आमच्या हांतात दिलो ना, जाल्यार तो घरा भायर दवरुन गेलो. आमी बेंगळुरूच्या सराजपूर रस्त्यार आशिल्ल्या इमारतीत रावतात. ही घडणूक सीसीटीव्हींत कैद जाल्या. हे विशीं आमकां सांगपी प्रत्यक्षदर्शी आसात अशेंय ह्या जोडप्यान व्हिडियोंत सांगलां. ‘इंडिया टुडे’न ही खबर दिल्या.
सॉफ्टवेअर इंजिनियर बायलेन सांगलें, आमी हे विशीं कंपनी म्हळ्यार अमेझॉन कडेन संपर्क सादलो. आमी दिल्ले पयशे कंपनीन आमकां परत केल्यात. पूण विखारी सोरप आयलो खंयच्यान? तो कोणाक चाबलो जाल्यार जीव वचूंक शकतालो. ऍमेझॉनाचे बेपर्वाक लागून ही घडणूक घडल्या. हे घडणुकेक कोण जापसालदार आसा? टेपी मारिल्ल्यान तो भितर आडकून उरिल्लो, नाजाल्यार कितें जावपाचें तें कळना.
कंपनीचो प्रतिसाद कितें?
इंजिनिअर जोडप्यान घाल्ल्या व्हिडियोचेर आनी गिरायकांक जें दुख्ख भोगचें पडलें तें खातीर ऍमेझॉन कंपनीन दुख्ख उक्तायलां. आमचो पंगड चवकशी करुन तुमकां हे विशीं बेगीन म्हायती दितलो अशें कंपनीन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
