भांगरभूंय | प्रतिनिधी
खबरां संस्था
महाबळेश्वरः चैन्नय सुपर किंग्जाक आयपीएलाचो चॅम्पियन करपी ओपनर ऋतुराज गायकवाड लग्न जाला. शेनवारा महाबळेश्वराक ताणे महाराष्ट्रची क्रिकेटीयर उत्कर्षा पवार हिच्या वांगडा सात फेरे घेतले. ह्या वर्सा लग्न करपी ऋतुराज पांचवो भारतीय क्रिकेटीयर आसा. हाचे पयलीं शार्दुल ठाकूर, हार्दिक पंड्या, अक्षर पटेल आनी केएल राहुल हांणी लग्न केलां.
13 ऑक्टोबर 1998 वर्सा जल्मल्लें उत्कर्षा महाराष्ट्र क्रिकेट पंगडांत खेळ्ळां. तें दाव्या हाताचें ऑलरावंडर आसा. पंजाबा आड 2021 वर्सा नोव्हेंबर म्हयन्यांत तें आपली निमणी वन-डे मॅच खेळल्लें. सध्या तें पुण्यांत इंस्टिट्यूट ऑफ न्यूट्रीशन एंड फिटनेस सायन्स अभ्यासक्रम पुराय करता.
ऋतुराजान लग्ना खातीर टीम इंडियांतल्या सुटी घेतल्या. वर्ल्ड टॅस्ट चॅम्पियनशीप फायनलींत ताका भारतीय पंगडांत स्टॅण्ड बाय म्हणून घेतिल्लं, मात लग्नाक लागून ताणे आपलें नांव फाटीं घेतले. ताचे सुवातेर यशस्वी जयस्वालाक संद दिल्या.ऋतुराज आनी उत्कर्षा आयपीएल फायनली उपरांत वांगडा दिसल्लीं. उत्कर्षान सीएसकेचो कॅप्टन महेंद्र सिंह धोनीक पांय पडून आशिर्वाद घेतल्लो.
फाटले दोन-तीन दीस लग्न सुवाळ्यांत मेहंदी, हळद आनी हेर कार्यावळीचें फोटे व्हायरल जाल्ले. फाटले जायते म्हयने सायली संजीवाचें नांव ऋतुराज गायकवाडा कडेन जोडलें वतालें. सायलीन ताचो न्हयकार केल्लो. फाटल्या सप्तकांत चेन्नयन आयपीएल करंड जिखल्या उपरांत ऋतुराजान तागेले जावपी घरकान्नी वांगडचो फोटो शॅर केलो आनी सायलीन ताकां लग्नाची परबीं भेटयलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
