भांगरभूंय | प्रतिनिधी
आंदोलनाची दिशा बदलपाचो ऊस उत्पादकांचो निर्णय
भांगरभूंय । प्रतिनिधी
फोंडें: संजिवनी साकर कारखान्या मुखार चवथ्या दिसा आंदोलन चालू दवरिल्ल्या ऊस उत्पादकांनी सोमारच्यान आंदोलनाची दिशा बदलपाचो निर्णय शुक्रारा घेतला. पणजेच्या आझाद मैदानार सोमारां धरणें आंदोलन सुरू करतले. ह्या वेळार चडांत चड ऊस उत्पादक हाजीर रावतले. तशेंच सांगें वाठारांत ऊस उत्पादक संघटणे आड सोशल मिडियाचेर बदनामी करपी मनशाच्या घरा मुखार लेगीत रोखडोच मोर्चो व्हरपाचो निर्णय आंदोलन करपी बायलांनी घेतला.
फाटल्या मंगळारच्यान ऊस उत्पादनांनी कारखान्याचे गेटी मुखार धरणें आंदोलनाक सुरवात केल्या. सरकारा कडल्यान अजून स्पश्टीकरण दिवंक ना. ऊस उत्पादकाक इथेनॉल प्रकल्पा संबंदांत स्पश्ट धोरण जाहीर करपाची मागणी करतात. शुक्रारा आंदोलन करपी ऊस उत्पादकांनी सोमारच्यान आझाद मैदानार धरणें आंदोलन सुरू करपाचो निर्णय घेतला. ताका लागून आंदोलन तापपाची शक्यताय आसा. आंदोलक मुख्यमंत्री डॉ. प्रमोद सावंत हांच्या बंगल्यार लेगीत मोर्चो व्हरपाची शक्यताय आसा. सांगें वाठारांत फाटल्या कांय दिसां सावन बंटी आनी बबली म्हूण फामाद जाल्लें एक जोडपें ऊस उत्पादक संघटणेची सोशल मिडियाचेर बदनामी करता. ताका लागून तिडकल्ल्या ऊस उत्पादकांतल्यो बायलो खंयच्याय खिणाक त्या बंटी आनी बबलीच्या घरा मुखार मोर्चो व्हरपाची शक्यताय आसा. त्या जोडप्यान संघटणेंत फूट घालपाचो सेगीत यत्न केला. ताका लागून तांच्या घराचेर मोर्चो व्हरपाची शक्यताय आसा. मोर्चो काडलो जाल्यार सांग्यार तणाव निर्माण जावपाची शक्यताय आसा.
ऊस उत्पादकांनी अपप्रचाराक बळी पडचे न्हयः देसाय
सोमारच्यान आझाद मैदानार धरणें आंदोलन सुरू करतले. शेनवारा आनी आयतारा सगळ्या ऊस उत्पादकांक जागरूक करतले. सोशल मिडियाचेर संघटणे आड अपप्रचार करून फूट घालपाचो यत्न एक जोडपें करता. ताका बळी पडनासतना ऊस उत्पादकांनी ह्या आंदोलनांत व्हड संख्येन वांटो घेवचो, अशें गोमंतक ऊस उत्पादक संघटणेचे अध्यक्ष राजेंद्र देसाय हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
