भांगरभूंय | प्रतिनिधी
फुडल्या वर्सा सावन साखर कारखानो सुरू करतले: मुख्यमंत्र्याचें आस्वासन
पणजी : आयज उस उत्पादकांनी धरणें आंदोलन फाटीं घेतलें. मुख्यमंत्री डॉ. प्रमोद सावंत हांणी फुडल्या वर्सा सावन संजीवनी साखर कारखानो फुडल्या वर्सा सावन सुरू करपाचें आस्वासन दिल्या उपरांत पणजेच्या आझाद मैदानाचेर चलिल्ले धरणें आंदोलन फाटीं घेतलें.
संजीवनी साखर कारखानो सुरू करपा विशीं सरकारान कडलेच तरेचें स्पश्टीकरण दिवंक नाशिल्ल्यान ऊस उत्पादकांनी पयलीं संजीवनी साखर कारखान्याच्या वाठारांत आंदोलन सुरू केल्लें. पूण सरकारान हाची दखल घेवंक नाशिल्ल्यान तांणी पणजेच्या आझाद मैदानाचेर येवन धरणें आंदोलनाक सुरवात केली. जो मेरेन मुख्यमंत्री कारखानो सुरू करपाचें स्पश्टीकरण दिना तो मेरेन धरणें आंदोलन सुरू दवरपाचो निर्धार शेतकर्यांनी केल्लो. पूण सोमारा दिसभर सरकारान आंदोलनाची दखल घेवंक ना. देखून विरोधी कॉंग्रेस, गोवा फॉरवर्ड, रिव्हॉल्युशनरी गोवन्स ह्या पक्षांनी ऊस उत्पादकांची भेट घेवन सरकाराचेर टिका केली. निमाणें मुख्यमंत्र्यांनी आंदोलकांच्या शिश्ठमंडळा कडेन आयज सकाळीं बसका घेवन साखर कारखानो फुडल्या वर्सा सावन सुरू करपाचें आस्वासन दिलें. उपरांत आंदोलकांनी आंदोलन फाटीं घेवपाचें जाहीर केलें.
इथेनॉल प्रकल्पा खातीर संजीवनी साखर कारखानो बंद करतले. पूण शेतकारांक फुडलीं पांच वर्सां तांच्या ऊसाचो मोबदलो दितले, अशें आस्वासन सरकारन दिल्लें. ते प्रमाण ऊस उत्पादकांक आतां मेरेन ३० कोटी रुपया सरकारान दिल्यात. इथेनॉल प्रकल्पा खातीर फुडले तीन म्हयने कंत्राटदार नेमून कारखानो फुडल्या वर्सा सावन सुरू करतले. ताका लागून शेतकारांकूय उसाची लागवड करपाक सांगलां, अशें मुख्यमंत्र्यान पत्रकारां कडेन उलयतना स्पश्ट केलें.
इथेनॉल प्रकल्पा खातीर निविदा जारी
संजीवनी कारखान्यांत इथेनॉल प्रकल्प उबारपा विशीं सरकारान आरएफक्यू निविदा जारी केल्या. ‘पीपीपी’ विभागान हे विशीं निविदा जारी केल्ल्यान निविदा भरपा खातीर १ मार्च २०२४ ही निमाणी तारीख दवरल्या. हाचे पयलींय ‘पीपीपी’न निविदा जारी केल्ली. तेन्ना दोन एजन्सी आयिल्ल्यो. पूण तांचे कडेन अणभव नाशिल्ल्यान तांकां संद दिवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
