भांगरभूंय | प्रतिनिधी
नवी दिल्ली, खबरां संस्था ः केंद्र सरकारान बुधवारा जाल्ले मंत्रीमंडळ बसकेंत उसाचो एफआरपी (फेअर रेम्युनरेटिव्ह प्राईस) 8 टक्क्यांनी वाडयला. राजधानी दिल्लींत शेतकारांचे आंदोलन चालू आसा. तेच वेळार मोदी सरकारान हो व्हडलो निर्णय घेतला. एफआरपी (फेअर रेम्युनरेटिव्ह प्राईस) 8 टक्क्यांनी वाडयल्यान देशांतल्या लाखांनी ऊस शेतकारांक फायदो जातलो. हो एफआरपी 1 ऑक्टोबर 2024 सावन लागू जातलो.
केंद्रीय मंत्री अनुराग ठाकुर हांणी हे विशीं म्हायती दिली. तांणी म्हणलें, साकर कारखान्या वरवीं शेतकारांक ऊंसाचें योग्य आनी फायदेशीर मोल थारावपा खातीर हो निर्णय घेतला. 1 ऑक्टोबर 2024 ते 30 सप्टेंबर 2025 मेरेनच्या ऊसाच्या हंगामा खातीर हो निर्णय घेतला. 2024-25 वर्सा दर क्विंटलाक 340 रुपया इतलो दर थारावपाचो निर्णय घेतला. फाटल्या वर्सा ही किंमत 315 रुपया आशिल्ली. हे खेपे तांतूत दर क्विंटलाक 25 रुपया वाडयल्या. ह्या नव्या धोरणाक लागून लाखांनी शेतकारांक फायदो जातलो.
एफआरपी म्हणल्यार कितें?
एफआरपी म्हळ्यार Fair Remunerative Price. सोपे भाशेंत म्हळ्यार साकर कारखान्यांनी दर टनाक ऊसाक दिल्लो दर. ऊसाच्या उत्पादनांतलो वट्ट खर्च आनी ताचेर सुमार 15% फायदो धरुन एफआरपी थारायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
