भांगरभूंय | प्रतिनिधी
सरपंच संध्या खाडीलकारः न्हांवपाक येवप्यांनी बांदाचें केलां लुकसाण
भांगरभूंय । प्रतिनिधी
वाळपयः नगरगांव पंचायत वाठारांतल्या उस्तें बांदार सुटयेच्या दिसांनी लोक न्हांवपा खातीर येतात. तातूंतले कांय जाण मस्ती करून बांदाच्या फळ्यांचें लुकसाण करतात. हाची दखल घेवन उस्तें बांदार येवपाक लोकांक मनाय करपाचो विचार नगरगांव पंचायत करता, अशी म्हायती सरपंच संध्या खाडीलकार हांणी दिली.
उस्तें बांदाच्या फळयांचें लुकसाण केल्ल्याचें लक्षांत येताच थळाव्या लोकांनी नगरगांव पंचायतीक निवेदन सादर करून लोकांक ह्या बांदार येवपाक मनाय करची, अशी मागणी केली. तशेंच थळाव्या लोकांनी वाळपयच्या शिंपणावळ खात्याच्या कार्यालयांत वचून ह्या संबंदांत कागाळ केली. ह्या वेळार सहाय्यक अभियंते शैलेश पोकळे हांचे कडेन तांणी खोलायेन चर्चा केली. अशें तरेन मस्ती करून बांदाचें लुकसाण केल्ले खातीर पोकळे हांणी नाराजी उक्तायली. तशेंच लोकांनी हे संबंदांत फुडाकार घेवन हे प्रकार नियंत्रणांत हाडचे खातीर आदार करपाचो उलो मारलो. मजगतीं, पंचायतीक दिल्ल्या निवेदनाची दखल घेवन सरपंच संध्या खाडीलकार आनी पंचायत सचीव विनायक सावंत हांणी ताकतिकेन घडणुकेचे सुवातेचेर वचून परिस्थितीची पळोवणी केली.
बांदाक भेट दिले उपरांत सरपंच खाडीलकार हांणी पत्रकारां कडेन उलयतना सांगलें, ह्या बांदा खातीर घातिल्ल्या लोखणाच्या फळयांक बुराक मारून लुकसाण करपाचो यत्न केला. ताका लागून फुडारांत ह्या बांदांतल्या उदकाच्या सांठ्याची पातळी देंवपाची शक्यताय आसा. तशें जालें जाल्यार शेती बागायतींक उदकाची समस्या निर्माण जावपाक शकता. थळाव्या लोकांनी हे संबंदांत निवेदन दिलां. ह्या निवेदनाची दखल घेवन ह्या बांदार येवपाक लोकांक मनाय करपाचो विचार करतले. सध्या खूब प्रमाणांत गरमी वाडल्या. ताचे पासून कांय प्रमाणांत थाकाय मेळची हे खातीर कांय लोक बांदार न्हावपाक येतात. मात त्या बांदाचें लुकसाण करप ही खऱ्यानीच दुर्दैवी प्रकार आसा. फुडारांत हे संबंदांक पंचायत खर कारवाय करपाचे नदरेंतल्यान निर्णय घेतली. लोकांचे हे करणेक लागून जर थळाव्या लोकांचें लुकसाण जाता जाल्यार पंचायत हे संबंदांत कसलेच तरेची घाळपणा करची ना, अशें सरपंच खाडीलकार हांणी सांगलें.
लोकांनी फुडाकार घेवचोः शैलेश पोकळे
उदक आडयात उदक जिरयात हे खातीर उस्तें बांद बांदला. उदकाचो साठो शेती बागायतीं खातीर मेळचो हो ते फाटलो उद्देश आसा. मात कांय जाण न्हांवपा खातीर ह्या बांदार येतात, तशेंच कांय जाण ताचें लुकसाण लेगीत करतात. थळाव्या लोकांनी हे संबंदांत फुडाकार घेतलो जाल्यार अशे प्रकार बंद जावपाक शकतात, अशें शिंपणावळ खात्याचे सहाय्यक अभियंते शैलेश पोकळे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
