भांगरभूंय | प्रतिनिधी
घरां, दोन पुलांक धोको : पुलिसांनी गस्त घालपाची मागणी
फोंडें: उसगांवां म्हादय न्हंयेच्या पात्रांत व्हडा प्रमाणांत जिलेटीनचे स्फोट करून नुस्तेंमारीक सुरवात जाल्या. आयतार आनी हेर सुटयेच्या दिसांनी कांय जाणांनी स्फोट करून नुस्तेंमारी केल्ल्यान आदल्या आनी नव्या पुला वांगडा भामय वाठारांतल्या घरांक तशेंच देवळाक धोको निर्माण जाला. हाका लागून पुला लागसारा जावपी जेलेटिनचे स्फोट बंद करपा खातीर पुलिसांनी गस्त घालची, अशी मागणी थळावे लोक करतात.
म्हादय न्हंयेंत व्हडा प्रमाणांत नुस्तें मेळिल्ल्यान कांय अनवळखी सध्या हांगा जिलेटीन स्फोट करून नुस्तेंमारी करतात. उसगाव पुला लागसारचे गांजे मेरेनचे न्हंयेंत स्फोट करतात. हाका लागून भामयच्या घरांक आनी दोनूय पुलांक धोको निर्माण जाला. पोरुंय अशेच तरेन नुस्तेंमारी चलताली. फाटल्या कांय दिसां सावन आयतार आनी हेर सुटयेच्या दिसांनी जायते स्फोट जाल्यात. उसगांव कालोत्सवाच्या वेळार जेलेटीनचे स्फोट पुला लागसारा केल्ले.
सध्या सकाळीं ५ ते ६ आनी ८ ते ९ वरांचेर ह्या जेलेटीन स्फोटांचे आवाज आयकुपाक येतात. ह्या स्फोटांक लागून भिरांकूळ घडणूक घडपाची शक्यताय आसा. तशेंच लागीं आशिल्ल्या घरांचे वणटींक वेर वचपाची शक्यताय आसा, असो भंय थळावे उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
