भांगरभूंय | प्रतिनिधी
-दोनूय घडणुकांचें कारण अस्पश्ट, पुलीस करतात चवकशी फोंडेंः अवंतीनगर -उसगांवां स्वताच्या घरांत बापूय बळीराम चंदीगडकर (70) हाचो कोयत्यान खून करून पूत प्रमोद बळीराम चंदीगडकर (40) हांणी घरांत गोळ घेवन आत्महत्या करपाची घडणूक घडल्या. आत्महत्या केल्ल्या प्रमोद चंदीगडकर हाची फाटल्या कांय दिसां पसून मानसीक स्थिती इबाडिल्ली. ताणें बापायचो खून मंगळारा रातीं केल्ल्याचो दुबाव पुलिसांनी उक्तायला.
तिस्क-उसगांवां बाजारांत हमाली करपी बळीराम चंदीगडकर हाचो पूतान घरांत कोयत्यान घाव घालून खून केलो. बळीराम हाचे तकलेचेर, गळ्याचेर आनी कुडीच्या हेर भागांचेर वार केल्ल्यान ताका मरण आयलें. ते उपरांत पूतान घरातूच गोळ घेवन आत्महत्या केली.
बुधवारा दनपरां फोंड्यां रावपी बळीराम हांची धूव घरां कडेन आयले उपरांत हो प्रकार उक्ताडार आयलो. हे विशीं फोंडें पुलिसांक म्हायती मेळ्ळे उपरांत पुलिसांनी घडणूक सुवातेर वचून पंचनामो केलो. थळाव्यांनी दिल्ले म्हायती प्रमाण, मंगळारा रातीं प्रमोद चंडीगडकर हो तिस्क उसगांवां बाजारांत भाेंवतना जायत्या जाणांनी पळयिल्लो. तांणी तुळशी लग्ना खातीर लागपी साहित्य आनी भाजयो मंगळारा रातीं खरेदी केल्ल्यो. बापूय आनी पूत दोगूय इश्टा प्रमाण घरांत रावताले. पूण मंगळारा रातीं बापायचो खून करपाचे कारण स्पश्ट जावंक ना. पुलीस ह्या प्रकरणाची चवकशी करतात.
मजगतीं, खून जाल्ल्या बळीराम हाचे बायलेक कोवीड काळांत मरण आयिल्लें. तशेंच 10-12 वर्सां पयलीं ताणें जावयाचो खून लेगीत उसगांवां केल्लो. ताका लागून ताची विधवा चली फोंड्यां रावताली. तशेंच कांय वर्सां पयली व्हडल्या पुताचे लग्न जाले उपरांत फकत 6 म्हयन्यां भितर ताका अचकींत मरण आयिल्लें. ते उपरांत ताची घरकान्न आपल्या कुळारा फोंड्यां रावताली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
