भांगरभूंय | प्रतिनिधी
ट्रक उमथलो स्कुटरीचेर, उडी मारिल्ल्यान जीव वाटावले
भांगरभूंय । प्रतिनिधी
फोंडें: उसगांवां गांवकारवाड्यार गतीन धांवपी रितो ट्रक स्कुटरीचेर उमथलो. ह्या अपघातांत तीग जाण जखमी जाले. जखमी जाल्ल्यां मदीं दिनेश गावडे (39), स्नेहल गावडे (31 आनी दित्या गावडे (2) हांचो आस्पाव आसा. अपघात प्रकरणांत पुलिसांनी ट्रक चालकाक ताब्यांत घेतला. अपघाता वेळार स्कुटरी वयल्या घोवा- बायलेन चल्याक घेवन उडी मारिल्ल्यान जिवीतहानी टळ्ळी.
मेळिल्ले म्हायती प्रमाण जीए 05 टी 6527 नंबराचो रितो ट्रक उसगांवच्यान वाळपयचे दिशेन वतालो. गांवकारवाड्यार वोल्ताचेर ट्रक चुकीचे दिशेन वचून कुशीक आशिल्ले राखणे वण्टीक आपटलो आनी रस्त्याचेर उमथून पडलो. त्याच वेळार उरफाटे दिशेन येवपी जीए 05 एन 0549 नंबराची स्कुटर येताली. अचकीत वोल्ताचेर ट्रक उमथता तो पळोवन स्कुटरी वयल्या घोवा- बायलेन चल्या सयत उडी मारली. तांची स्कुटर उमथिल्ल्या ट्रका पोंदा चिड्डली. जर घोवा- बायलेन उडी मारूंक नाशिल्ली जाल्यार व्हड दुर्घटणा घडटली आशिल्ली. अपघातांत ट्रकाचे फुडलो दोनूय टायर तुटून रस्त्याचेर पडिल्ले. अपघात प्रकरणांत पुलिसांनी ट्रक चालकाक चवकशे खातीर ताब्यांत घेतला. फोंडें पुलीस स्टेशनाचे हवालदार देविदास पर्येंकार हांणी अपघाताचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
