भांगरभूंय | प्रतिनिधी
फोंडें, प्रतिनिधी: उसगांवचे नेस्ले कंपनी मुखार मोटार सायकलीक कंटेनराचो धपको बसून मोटारीच्या फाटल्यान बशिल्लो युवराज हनुमंत पाटील (१९, उसगांव) हो तरणाटो जखमी जालो. जाल्यार मोटार सायकल चालक वंश उमेश नायक (२०, भोमा ) हो वाटवलो. अपघातांत कंटेनरांत घुशिल्ली मोटार सायकल सुमार ८०० मीटर अंतराचेर आशिल्ले एमआरआफ कंपनी मुखारच्या रस्त्याचेर कोसळ्ळी. फोंडें पुलिसांनी अपघाताचो पंचनामो केला.
पुलिसांनी दिल्ले प्रमाण, आयतारा रातच्या साडेबारांक जीए- ०५- व्ही – ५६३२ नंबराची मोटार सायकल नेस्ले कंपनीच्या गेटी कडल्यान मुखेल रस्त्यार वताली. तेन्ना फोंडेंच्यान मोल्यां दिकेन वचपी आरजे- ११- जीसी- ८८२१ क्रमांकाच्या कंटेनराचो धपको तिका बसलो. हातूंत दोगूय रस्त्याचेर कोसळ्ळे. जाल्यार कंटेनराक आडकल्ली मोटार सायकल सुमार ८०० मिटर अंतराचेर आशिल्ल्या एमआरएफ कंपनी लागसारा रस्त्यार वचून कोसळ्ळी. जखमी जाल्ल्या तरणाट्यांचेर फोंडेंच्या उपजिल्लो हॉस्पिटलांत उपचार सुरु आसात. हवालदार रघुनाथ गांवस हांणी निरीक्षक विजयनाथ कवळेकार हांच्या मार्गदर्शना खाला अपघाताचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
