भांगरभूंय | प्रतिनिधी
भांगरभूंय । प्रतिनिधी
म्हापशेंः उसकय आनी बस्तोडें गांवातली वीज पुरवण सदांच खंडीत जावपाक लागल्ल्यान लोक सामके बेजारल्यात. नागवा वीज केंद्राक फीडर जोडसावन व्हो प्रकार सुरू जाल्ल्यान नास्नोळा वीज केंद्राक व्हो फीडर परत जोडून वीज पुरवण सुरळीत करची अशी मागणी गांवच्या लोकांनी केल्या.
फाटल्या कांय म्हयन्यां सावन विजेचो आपालिपा सुरू आसा. रातयां बरींच वरां वीज आसना. वीज खातें लेगीत मनात येता तेन्ना शटडावन करता. उसकय-पालयें- पुनोळा आनी बस्तोडें ह्या दोनूय पंचायत वाठारांत वीज पुरवणेची समस्या उप्रासल्या. कळंगुटे वीज केंद्र स्थापन केल्ल्या सावन उसकय आनी बस्तोडें पंचायत वाठाराक वीज पुरवण करपी फीडर नागवा केंद्राक जोडला. ताचे पयलीं तो नास्नोळा केंद्राक जोडल्लो.
वीज पुरवण बंद पडल्यार 11 केव्ही वीज वाहिन्या वा फीडरांत दोश जाला अशी कारणा वीज अधिकारी दितात. सध्या पावस नासतना विजेची ही समस्या जाल्यार पावसाच्या दिसांनी ती कसलें रुप घेतलें अशें लोक विचारतात. पावसा पयलीं वाहिनी आनी फीडराच्या प्रश्नाचेर तोडगो काडपाची मागणी तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
