भांगरभूंय | प्रतिनिधी
दोंगर कापणी नेटान; चंदनवाडी- बस्तोडेंच्या लोकांचे हाल
भांगरभूंय । प्रतिनिधी
म्हापशें: उसयक व्हड प्रमाणांत दोंगर कापणी सुरू आसा. हें काम चालू आशिल्लें तेन्ना उदकाची पायपलायन फुटली. ताका लागून चंदनवाडी बस्तोडेंच्या लोकां मुखार उदकाचें संकट निर्माण जालां.
चंदनवाडी बस्तोडेंच्या शीम वाठारांत उसकय पंचायतींतल्या दोंगराचेर इमारत प्रकल्पाचें बांदकाम करचे खातीर बांदकाम करपी दोंगर कापता. जेसीबीच्या आदारान फाटल्या कांय दिसां सावन हें काम सुरु जालां. ह्या प्रकल्पा खातीर दोंगरा वयलीं कांय झाडांय मारल्यांत.
जेसीबीच्या आदारान सोमारा सकाळीं दोंगर कांपतना चंदनवाडी वाड्याचेर उदका पुरवण करपी मुख्य पायपलायनी वांगडाच हेर कांय घरांच्यो उदक कनेक्शन तुटलें. ताका लागून नळाचें उदक बंद जालें, अशी म्हायती थळावे नागरीक राजेश धुपदाळे, हेमलता साळकार, वैशाली शिरोडकार आनी हेरांनी दिली. ह्या प्रकल्पाचें बांदकाम करचे खातीर आमच्या घरा मदीं योग्य सॅटबॅक दवरपाचें उतर जमीन धनी तशेंच बांदकाम करप्यान दिल्लें. पूण प्रत्यक्षांत दोंगर कापपाचें काम सुरू केले उपरांत आमच्या घरा कुशीक राखणे वण्टा खातीर फोंडकूल मारलें. ह्या वेळार वाड्या वयली मुख्य पायपलायनी सयत घराचें कनेक्शन तोडलें. ही पायपलायन दुरुस्त करपाचें उतर बांदकाम निरिक्षकान दिल्लें, पूण सांज मेरेन तांणी ती दुरुस्ती करूंक ना. उसकय पंचायत तशेंच संबंदीत खात्यां कडेन ह्या बांदकाम प्रकल्पा विशीं कागाळ करतले, अशें थळाव्या लोकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
