भांगरभूंय | प्रतिनिधी
नाटकी घडामोडींत पंचायत परतून भाजपा कडेनूच
भांगरभूंय । प्रतिनिधी
म्हापशें : उसकय – पालयें – पुनोळाच्या सरपंचपदार रिया राजेश मयेंकार हांची विरोधाविणें निवड जाली. आदली सरपंच रिचा साळगांवकार हांच्या विरोधांत अविस्वास थाराव दाखल जाले उपरांत तांणी पल्या पदाचो राजिनामो दिल्ल्यान हें पद रितें जाल्लें.
मंगळारा 11 मार्चाक सकाळीं पंचायत मंडळाची विशेश बसका जाली. ह्या वेळार उपसरपंच आल्फी डिसोझा, गौरवी मडगांवकार, रिया मयेंकर, ख्रिस्टीना डिसोझा, रिचा साळगांवकार, आनंद गडेकार आनी दीपाली हळर्णकार हे सगळे पंच उपस्थीत आशिल्ले.
सरपंचपदा खातीर रिया मयेंकार हांचो एकलीचोच अर्ज दाखल जालो. ताका लागून तांची ह्या पदा खातीर विरोधाविणें निवड जाल्ल्याचें वेंचणूक अधिकाऱ्यांनी जाहीर केलें. वेंचणूक अधिकारी म्हूण गटविकास अधिकारी कार्यालयाचे विस्तार अधिकारी कृष्णा गडेकार हांणी कामकाड पळयलें. तांकां पंचायत सचीव चेतन शिरोडकार हांणी मजत केली.
निवडी उपरांत सरपंच रिया मयेंकार हांणी सत्ताधारी गटा वांगडा मुख्यमंत्री डॉ. प्रमोद सावंत आनी भाजप प्रदेशाध्यक्ष दामू नायक हांची मंत्री रोहन खंवटे आनी आदले आमदार ग्लेन टिकलो हांचे सयत भेट घेतली. मुख्यमंत्री आनी भाजप प्रदेशाध्यान सरपंच मयेंकार हांकां परबीं दिलीं.
मजगतीं, पंचायत मंडळांत सरपंचपदाच्या राजकारणा वयल्यान सत्ताधारी गटांत फूट पडिल्ली. 20 फेब्रुवारीक विरोधी गटांतले आल्फी डिसोझा हांची उपसरपंचपदार निवड जाल्ली. हे निवडी उपरांत रोखडोच सरपंचा आड अविस्वास थाराव सातांतल्या चार पंचांनी दाखल केल्लो. मात नाटकी घडामोडींत सत्ताधारी गटांतले मतभेद पयस जाल्ल्यान परतून ह्याच गटाची पंचायतीचेर सत्ता कायम उरली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
