भांगरभूंय | प्रतिनिधी
दे शांत खूबश्या राज्यांनी पारो सुमारा भायर वाडला. ताका लागून सर्वसामान्यांक उबाळाचो त्रास सोंसचो पडटा. घरांतल्यान भायर सरप लेगीत त्रासाचें जालां. कारण वाडिल्ल्या उबाळ्याक लागून हवा तापता. ताका लागून प्रवास करतना लेगीत खूब जाणांक त्रास जातात. वाडिल्ल्या तापमानाक लागून उदकाचो वापर लेगीत वाडला.
हवामान विभागाच्या म्हणण्या प्रमाण, मैदानी वाठारांत चडांत चड तापमान 40 अंश, दर्यादेग वाठारांत 37 अंश, दोंगराळ वाठारांत तापमान 30 अंश सेल्सियस मेरेन पावता तेन्ना, उश्णतेचें ल्हार सुरू जाता जर तापमान सामान्य परस 6.4 अंश सेल्सियस चड आसत जाल्यार खर उश्णतेचें ल्हार घोशीत करतात. म्हणल्यार, जर तापमान 47 अंश सेल्सियस मेरेन पावत जाल्यार तें जीवघेणें थारता. भारतांत मार्च ते जून ह्या काळांत उश्णतेचीं ल्हारां येतात. केन्ना केन्ना जुलयांत लेगीत ह्या ल्हारांचो अणभव येता.
भारतीय हवामान विभागान निश्चीत केल्ले मर्यादे परस तापमान चड वाडलें जाल्यार लोकांक त्रास सोंसचो पडटा. ताका लागून उश्माघात आनी हेर घडणुको टाळचे खातीर एक अलर्ट जारी करतात. तातूंत गरज नासतना घरा भायर वचूं नाकात, अशी शिटकावणी दितात.
उश्णतेचीं ल्हारा थीर हवेर लागून तयार जातात. वातावणांतल्या उच्च दाबाक लागून हवा सकयले वटेन धुकलता. मात ती हवा जमनी मेरेन पावना. तापिल्ले जमनीक लागून ती हवा जमनी पासून कांय अंतराचेर एकठांय जाता आनी एकादे दिशेन वचपाक लागता. ह्या हवेच्या प्रवाहाक उश्णतेचें ल्हार अशें म्हणटात. म्हत्वाची गजाल म्हणल्यार तीं ल्हारां आडावपाचे कसलेच उपाय नात.
उश्णतेच्या ल्हारां वेळार घेवपाची जतनाय
उश्णतेच्या ल्हाराचो कुडीचेर वायट परिणाम जाता. ताका लागून वतांत वचपाचें टाळचें. तशेंच एकसारकें उदक पियेवचें.
एसींतल्यान थेट रखरखीत वतांत वचूं नाकात.
तुमकां वतांत भायर वचपाचेंच आसत जाल्यार तुमची तकली सुती कपड्यान धांपात, तशेंच लेव रंगाचे सदळ कपडे घालात.
वतांतल्यान घरा आयले उपरांत रोखडेंच थंड उदक पियेवपाची चूक करूं नाकात.
कुडीक सदांच हायड्रेट दवरात. फळां, ज्यूस, आडसराचें उदक, लिंबू सरबत पियात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
