भांगरभूंय | प्रतिनिधी
मिर्झापुर, खबरां संस्था ः लोकसभा वेंचणुकेच्या सातव्या आनी निमाण्या टप्प्या खातीर आयज शेनवारा सात राज्यांतल्या आनी एका संघ प्रदेशांतल्या 57 मतदारसंघांनी मतदान जातलें. मतदान ड्युटीचेर आशिल्ल्या सरकारी कर्मचाऱ्यांक एक दीस आदीं थारायिल्ल्या मतदान केंद्राचेर वचचें पडटा. सध्या पुराय देशांत उश्णतायेत बरीच वाड जाल्ली आसा. देखून ह्या कर्मचाऱ्यांकय हें उश्णतायेचे त्रास सोंसचे पडटात. तेच प्रमाण उत्तर प्रदेश आनी बिहारांत मतदानाक ड्युटीचेर आशिल्ल्या 18 कर्मचाऱ्यांक उश्णतायेक लागून मरण आयलां.
मजगतीं, उत्तर प्रदेश आनी बिहारांत वेंचणुकेच्या ड्युटी खातीर तैनात केल्ल्या 18 मतदान कर्मचाऱ्यांक फाटल्या 24 वरांत उश्णतायेक लागून मरण आयलां. हातूंत बिहारांत उश्णतायेक लागून 10 मतदान कर्मचाऱ्यांक मरण आयलें. जाल्यार उत्तर प्रदेशांतल्या मिर्जापूर जिल्ह्यांत 8 जाणांक मरण आयिल्ल्याची म्हायती मेळ्ळ्या.
मजगतीं, ऑल इंडिया रेडिओन आपल्या अधिकृत एक्स खात्या वरवीं दिल्ले म्हायती प्रमाण बिहारांत वाडत वचपी तापमान आनी उश्णताय ल्हारांक लागून आतां मेरेन 29 जाणांक मरण आयलां. तातूंतले फकत औरंगाबादांत 12 जाणांक मरण आयलां. उश्णतायेक लागून 200 परस चड लोक दुयेंत आसात. फाटल्या 50 वर्सांत उश्णतायेक लागून 17 हजारां वयर लोकांक मरण आयलां. ह्या अहवाला प्रमाण 1971 ते 2019 मेरेन देशांत उश्णतायेच्या ल्हारांक लागून 708 जाणांक मरण आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
