भांगरभूंय | प्रतिनिधी
सिंधू, गंगा, बह्मपुत्रा ह्यो भारताच्यो न्हंयो संस्कृतीक आनी नागरी गिरेस्तकायेचे नदरेन खूब म्हत्वाच्यो आसात. ह्या
न्हंयांच्या देगेर जायतीं व्हड शारां आनी वसणुको जाल्यात. शेतवडीचे नदरेनय ह्यो न्हंयो खूब म्हत्वाच्यो. तांणी हजारांनी वर्सां भारतीय संस्कृताय तिगोवन दवरल्या. भारतीयां खातीर भावनिक पांवड्यारय ह्यो न्हंयो म्हत्वाच्यो. वैदिक काळा सावन ऋषींनी लेगीत ह्या न्हंयांचें म्हत्व सांगलां. संयुक्त राश्ट्रांचे सरचिटणीस आंतोनियो गुटेरेस हांणी हालींच न्हंयांनी उदकाचो प्रवाह उणो जातलो, अशी शिटकावणी दिल्या
संवसारांतलें तापमान वाडिल्ल्यान आनी फुडल्या कांय दशकांनी हिमन्हंयो आनी बर्फाचे थर उणे जाल्ल्यान हें संकश्ट निर्माण जातलें, अशें ते सांगतात. धर्तरे वयल्या सगळ्या जिवांक, हे हिमन्हंयो खूब म्हत्वाच्यो तशेंच उदकाचो मुखेल स्त्रोत आसात. संवसारीक तापमान दर वर्सा वाडत आसा. ताचो परिणाम म्हळ्यार हिमखंड वितळप. बर्फाचो थर उणो जावपा वांगडाच दर्यांतल्या उदकाची पातळीय वाडत आसा. फाटल्या शंबर वर्सांत संवसारीक दर्या पातळेंत नेटान वाड जाल्या. हाका लागून जायतीं शारां बुडपाची भिरांत आसा. हातूंत भारतांतलें सगळ्यांत व्हडलें शार मुंबयचोय आसपाव आसा. हाका लागून अर्थांतच संवसारांत हुंवार, दुकळ आदी घडपाची शक्यताय वाडत वचपाची आसा.
दर्या प्लास्टीक कोयरान भरल्यात, व्हड प्रमाणांत रानां कत्तल जातात. वेगवेगळ्या देशांतल्या शारीकरणाक लागून वाहनां वाडत आसात. एकूणच मनीस सैमाचेर व्हड प्रमाणांत हल्लो करता. जनावरां, किडी, जनावरां आनी सुकणीं हांचो संबंद उणो जायत आसा, सैमाचो समतोल योग्य रितीन सांबाळपाक जाय. नाजाल्यार मनीस जाती खातीर व्हड संकश्ट येवप अपरिहार्य आसा, हातूंत दुबाव ना.
आनंदी देशां मदीं भारत फाटीं
दर वर्सा संवसारांतल्या सगळ्यांत सुखी (आनंदी) देशांची वळेरी संवसारीक सुख निर्देशांकांतल्यान जाहीर जाता. हे वळेरेंत भारताचो क्रमांक 126 वो आसा. फाटल्या वर्सा तो 136 वे सुवातेर आशिल्लो. हे सुखाच्या वळेरेंत भारताचे सगळे शेजारी भारता परस फुडें आसात. पाकिस्तान 108 वे सुवातेर आसा. ते उपरांत बांगलादेश 118 व्या क्रमांकाचेर आसा. श्रीलंका 112 व्या क्रमांकाचेर आसा.
फाटल्या 10 वर्सांत फिनलॅंडान सगळ्यांत सुखी देशांत आपली पयली सुवात तिगोवन दवरल्या. फिनलॅंडा उपरांत डेन्मार्क, आयसलँड, इस्राएल, नेदर्लंड्स, स्वीडन, नॉर्वे आसा. अफगाणिस्तान सगल्यांत निमणो आसा. पोरूं सावन झुजाच्या सावळेंत आशिल्ले रशिया आनी युक्रेन हे देश. रशिया 70 वे आनी युक्रेन 92 वे सुवातेर आसा.
आनंद, सुखाचो इंडेक्स थारायतना फुडल्या गजालींचो विचार करतात. 1. पयशे मेळप, 2. भलायकी, 3. मुक्ती, स्वातंत्र्य, 4. उदारताय.
भारतांत गिरेस्त आनी गरीब हांचे मदीं अजूनय व्हड फरक आसा. तशेंच गांवगिऱ्या वाठारांनी वैजकी सुविधांचो उणाव आसा. हाचोय ह्या निर्देशांकाचेर परिणाम जाता आसतलो. सुखी देशांच्या वळेरेंत भारताची सुवात वयर हाडपाक उपाय करपाक जाय.आमी खंय फाटीं आसात हाचोय अभ्यास करप गरजेचें.
मरणाचे ख्यास्तीक पर्याय आसा?
मरणाची ख्यास्त दिवपाक खंयचे पर्याय आसात? कितलेशेच दीस हाचेर देशभरांत विचारमंथन चलता. आतां सर्वोच्च न्यायालयान समिती नेमपाचे संकेत दिल्यात. संवसारांतल्या वट्ट 55 देशांनी फांशीची ख्यास्त दिवपाची तरतूद आसा. ब्रिटीश सत्ते खाला आशिल्ल्या ह्या देशां मदीं खास्त म्हूण फांशीची तरतूद आसा.
अमेरिकेंत 27 राज्यांनी मरणाची ख्यास्त फांशी बदला इंजेक्शनान दितात. कांय राज्यांनी लायटीचो शाॅक दिवन मारतात. चीन आनी सावदी अरेबियांत ‘फायरिंग स्क्वाडा’न मरण दितात. भारतांत लश्करी कायद्या खाला फांशी वा फारपेट करून फांशी दिवपाची तरतूद आसा.
गुन्यांवकाराक फांशीचो त्रास जावचो न्हय, म्हूण जायते उपाय सुचयल्यात. हे बाबतींत सर्वोच्च न्यायालयांतय याचिका दाखल केल्या. हे याचिकेचेर सुनावणी मे म्हयन्यांत जातली अशें कळता. ऋषी मल्होत्रा हांणी 2017 वर्सा हे संबंदी याचिका दाखल केल्ली.
शांताराम वाघ
9623452553
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
