भांगरभूंय | प्रतिनिधी
दिसान दीस वाडत वचपी उश्णतायेक लागून नागरिकांक जगप कठीण जावपाक लागलां. खर उश्णतायेक लागून नागरिकांक खूब त्रास सोंसचे पडटात. हाका लागून ह्या दिसांनी स्वताची खाशेली जतनाय घेवप खूब गरजेचें. खास करून वतांतल्यान घरा येतकच खूब थकवो, कासेद जाणवता. अशे स्थितींत कांय गजालींची जतनाय घेवन गिमाळ्यांत स्वताक निरोगी दवरप शक्य आसा.
तापमान वाडटना हवामान खात्यान देशांतल्या जायत्या राज्यांक उश्णताय ल्हारांची शिटकावणी दिल्या. अशे परिस्थितींत दनपारां 12 ते दनपरां 4 वरां मजगतीं नागरिकांनी भायर सरचें न्हय, अशें सांगला. पूण, कांय कामां खातीर भायर सरचें पडटाच. वतांतल्यान घरां आयले उपरांत कांय उपाय घेवन तुमची कूड थंड दवरूं येता. हे खातीर दिल्लींतल्या सी के बिर्ला हॉस्पिटलाच्या वैजकी विभागाचे वरिश्ठ सल्लागार डॉ. राजीव गुप्तान एका वेबसायटीचेर हे विशीं म्हायती दिल्या.
1) पेयां पियात
गिमाच्या दिसांनी उश्णताये पसून स्वताची राखण करपाक कुडीक हायड्रेटेड दवरप खूब म्हत्वाचें. हे खातीर दीसभर फावो तितलें उदक पियेवचें. तशेंच कैरी पन्हे, सत्तू, ताक आदी पेयां तुमच्या आहारांत आस्पावूं येतात. वतांतल्यान आयले उपरांत रोखडेंच फ्रिजांतले थंड उदक पियेवचें न्हय.
2) न्हावन घेयात
वताक लागून जायत्या जाणांक भरपूर घाम येता. घामाक लागून आमचे कुडीचेर जायते जंतू येवपाचो धोको वाडटा. अशा वेळार घरा येतकच न्हावप फायद्याचें थारूं शकता. न्हातकच कुडीक थंडसाण मेळटाच, पूण जंतू पयस जातात. पूण याद दवरात, वतांतल्यान आयले उपरांत कांय वेळान न्हावचें.
3) फॅन वा एअर कंडिशनर वापरात
वतांतल्यान घरा आयले उपरांत हात- पांय धुवन पंख्याचो वा एअर कंडिशनराचो वापर करून स्वताक थंड करपाक मेळटा. ताचो वापर केल्यार तुमकां उश्णतायेंतल्यान सुटका मेळटलीच, पूण तुमची कूड थंड उरतली.
4) सुटसुटीत कपडे घालचे
गिमाच्या दिसांनी आंग थंड दवरपाक कॉटन कपडे घालचे. हाचे भायर हलक्या रंगाचे आनी सुटसुटीत कपडे उपेगी पडटात. गडद रंगाचे, काळे कपडे गिमांत घालचें न्हय.
5) चड शारिरीक हालचाल नाका
गिमाच्या दिसांनी भायल्यान येतकच चड करून सगलेच खूब जाम जातात. अशा वेळार घरांत येतकच कसलीच जड शारिरीक हालचाल करची न्हय आनी शक्य तितलो आराम करात.
गिमाच्या दिसांनी खंयच्याय प्रकाराचे दुयेंस जाल्यार घरगुती उपाय टाळचे. कारण ताका लागून दुयेंस वाडूंक शकता आनी स्थिती आनीक इबाडूक शकता. गिमाच्या दिसांनी वताक लागून जोर, हागवण, थकवो येवप, अपचन आदि त्रास जावंक शकतात. हाचे भायर ह्या हंगामांत बेळशेल्लें, चड तीख अन्न खाल्ल्यार अन्न विखबाधा, मोडशी सारकिल्लें त्रास जावंक शकतात. देखून वेळार दोतोराचो सल्लो घेवचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
