भांगरभूंय | प्रतिनिधी
नवी दिल्ली, खबरां संस्था ः अंदूंय गंवाचे दर चड उरूंक शकतात. हवामान खात्यान दिल्ले म्हायती प्रमाण, मार्च ते मे मेरेन उश्णतायेचे तापमान सामान्या परस चड उरपाची शक्यताय आसा. जाका लागून गंवाचें उत्पादन उणें जावंक शकता. फाटल्या चार वर्सां सावन गंवाचे दर वाडपा फाटल्यान वायट हवामान हें मुखेल कारण आसा.
अंदूंचो फेब्रुवारी म्हयनो फाटल्या 125 वर्सांतलो सगळ्यांत उश्ण म्हयनो थारलो. मार्च ते एप्रिल मेरेन देशांतले चडशे वाठार सामान्या परस चड उश्ण आसतले अशें हवामानशास्त्रज्ञांचें मत आसा. तशेंच मार्च म्हयन्यांत उश्ण वारें वाडपाची शक्यताय आसा.
आयएमडीन गिमाच्या अदमासांत म्हणलां, मध्य भारतांतल्या चडशा वाठारांनी आनी दक्षीण भारतांतल्या कांय वाठारांनी मार्च 2025 वर्सा सामान्या परस चड उश्णताय ल्हारां येवपाची शक्यताय आसा. गिमाच्या दिसांनी वर्साक फकत एक फावट पिकोवंक मेळपी आनी सुमार अर्द्या देशांतल्या लोकांक अन्नधान्याचो मुखेल स्त्रोत आशिल्ले गंव इतले उंचेल्या तापमानाक सोंसूक शकना.
पंजाब, हरियाणा आनी उत्तर प्रदेशांत उश्णतायेचो परिणाम…
गंव उत्पादन संवर्धन सोसायटीचे (APPS) अध्यक्ष अजय गोयल हांणी सांगलें, पंजाब, हरियाणा आनी उत्तर प्रदेशांत उश्णतायेचो परिणाम चड जातलो. हांगा गंवाचे कण मिल्किंग अवस्थेंत प्रवेश करतले आनी आकार वाडपाक लागतलो. चड तापमानाक लागून कड्डण आकुंचन जातलें, जाका लागून दर एका कणाचें वजन उणें जातलें. हाका लागून गंवाच्या पिकाचें एकंदरीत उत्पादन उणें जातलें. फाटल्या चार वर्सांत गंवाच्या उत्पादनांत लेगीत उणाव जाल्ल्यान सरकार कडेन आशिल्लो गंवाचो सांठो उणो जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
