भांगरभूंय | प्रतिनिधी
मडगांव: शाळांनी माध्यान्ह आहार ही विद्यार्थ्यां खातीर नेमाची गजाल आसली तरी दवर्ली सरकारी मुळावे शाळेच्या विद्यार्थ्यां खातीर बिरेस्ताराचो माध्यान्ह आहार विशेश असो थारलो. नावेलीचे आमदार उल्हास तुयेंकार हांणी बिरेस्तारा हे शाळेक भेट दिलीच, पूण विद्यार्थ्यां बरोबर तांणी माध्यान्ह आहारूय घेतिल्ल्यान विद्यार्थ्यां मदीं खोशी निर्माण जाली.
तुयेंकार हांणी शाळेच्या इमारतीची स्थिती पळोवपा खातीर ही भेट दिल्ली. ह्या वेळार दवर्ली दिकरपालचे सरपंच संतोष नायक, पंच साईश राजाध्यक्ष, विद्याधर आर्लेकार आनी संपदा नायक तांचे बरोबर आशिल्ल्यो.
शाळेची पळोवणी केले उपरांत तुयेंकार हांचे सयत सरपंच आनी पंचांनी भुरग्यां बरोबर माध्यान्ह आहार घेतलो. आपले बरोबर आमदार, सरपंच, पंच माध्यान्ह आहार करीत आशिल्ल्यान भुरग्यां मदीं लेगीत खोशी निर्माण जाली.
आमदार, सरपंच आनी पंचा कडल्यान मेळिल्ल्या सन्मानाक लागून भुरगीं खूश जालीं आनी हो अणभव तांचे यादींत उरतलो अशें शाळेच्या शिक्षकांनी सांगलें.
भुरग्यां बरोबर माध्यान्ह आहार घेवपाचो हो अणभव खोशयेचो आशिल्लो. आमदार म्हूण समाजांतल्या वेगळ्यावेगळ्या घटकां कडेन संबंद येता. पूण मुळावे शाळेंतल्या विद्यार्थ्यां कडेन ह्या निमतान संवाद सादलो, हो अणभव वेगळोच आशिल्लो अशें उल्हास तुयेंकार हांणी सांगलें.
शाळा इमारतीच्या दुरुस्तीची निविदा जारी केल्या आनी ह्या इमारतीच्या दुरुस्तीचें काम रोखडेंच हातांत घेतले अशें तुयेंकार हांणी मुखार उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
