भांगरभूंय | प्रतिनिधी
रवी नायकः रितेश नायक हांणी साबार समस्या सोडयिल्ल्याचो दावो
भांगरभूंय । प्रतिनिधी
फोंडें: फोंडें पालिका वेंचणुके आदींच फोंडें नागरीक समितीचे दोन उमेदवार बिनविरोध वेंचून आयल्यात. उरिल्ले 13 उमेदवारूय निश्चीत जिखून येतले. लोकांच्या आदारान फुडारांत फोंडें हो तिसरो जिल्हो म्हूण अस्तित्वांत आयले उपरांत प्रसाशन लोकांच्या दारांत पावतलें, अशी म्हायती शेतकी मंत्री रवी नायक हांणी फोंड्यां पत्रकार परिशदेंत दिली.
भुंयगत वीज केबल, घाणयाऱ्या उदकाचेर प्रक्रिया करपी प्रकल्प, गॅस पायपलायन, रस्त्याचें हॉटमिक्सींग, मार्केट प्रकल्पाची दुरुस्ती आनी हेर समस्या फाटल्या वर्सभरांत रितेश नायक हांणी नगराध्यक्षपदाच्या काळांत सोडयल्यात. फोंडें शारा खातीर तयार केल्लो मास्टर प्लॅन फुडारांत प्रत्यक्षांत हाडपाची गरज आसा. ते खातीर वेंचणुकेंत फोंडें नागरीक समितीचे उरिल्ले 13 उमेदवार भोवमतांनी वेंचून येवपाची गरज आसा, अशें मंत्री नायक हांणी सांगलें. तिस्क फोंडेंच्या मुळाव्या भलायकी केंद्राचे सुवातेचेर कला आनी संस्कृती खात्या वतीन वाचपघर बांदतले. तशेंच क्रांती मैदाना लागसार लश्कराच्या ताब्यांत आशिल्ली जमीन पालिकेच्या ताब्यांत घेवचे खातीर प्रक्रिया सुरू केल्या. केंद्रीय संरक्षण मंत्री राजनाथ सिंह हांचे कडेन आपूण स्वता आनी रितेश नायक हांणी चर्चा क ल्या. ती जमीन ताब्यांत घेवन जमनीचो वापर लोकां खातीर करतले, अशेंय मंत्री नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
