भांगरभूंय | प्रतिनिधी
पणजीः आतां मेरेन ३७३ स्वातंत्र्य सैनिकांच्या भुरग्यांक सरकारी नोकर्यो दिल्यात. फकत २५ जाण नोकर्यांचे प्रतिक्षेंत आसात जाल्यार ४० जाण अपात्र थारल्यात. ह्या सगळ्यांक १९ डिसेंबरा पयलीं नोकर्यो दितले, अशें आस्वासन मुख्यमंत्री डॉ. प्रमोद सावंत हांणी दिलें.
स्वातंत्र्य सैनिकांच्या कांय भुरग्यांक ५० वर्सां पिरायेचेर सरकारी नोकर्यो मेळ्ळ्यात. देखून सरकारी सेवेंत तांकां फकत १५ ते २० वर्सां इतलींच मेळटा. तांची बडटी आनी पेन्शना खातीर खासा तरतूद करपाची मागणी मांद्रेंचे आमदार जीत आरोलकार हांणी सभाघरांत केली.
हाचेर जाप दितना पयलींच्या सरकारांक स्वातंत्र्य सैनिकांचें पडूंक नाशिल्लें. तांणी हो विशय गंभीर घेवंक नाशिल्ल्यान हो विशय तयार जाला. म्हज्या सरकारान पयलेच खेपे तांकां नोकरी दिवपाची येवजण चालीक लायल्या, अशें मुख्यमंत्र्यान सांगलें.
सरकारी नोकरे खातीर स्वांतत्र्य सैनिकांच्या भुरग्यां कडल्यान ४३८ अर्ज आयिल्ले. तातुंतले ४० अर्ज अपात्र थारल्यात. ३९८ भुरग्यांक क आनी ड श्रेणीत सरकारी नोकर्यो दिल्यात. फक्त २५ जाणांक नोकर्यो दिवपाचें उरलां. उरिल्ले २५ जाण आनी ४० जाण जे अपात्र थारल्यात तांच्या अर्जाचेर परत फेरविचार करीत १९ डिसेंबरा पयलीं तांकां सरकारी नोकर्यो दितले, अशें आस्वासन मुख्यमंत्र्यान दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
