भांगरभूंय | प्रतिनिधी
प्रत्येक मनशांत हांवरेपण लिपिल्लें आसता आनी संद मेळटा तेन्ना तो ताचें प्रदर्शन करता. झटपट येश, पयसो मेळोवपाक कांय जाण लटपटी- खटपटी करतात. ह्यो सगल्यो गजाली कायदेशीर रितीन जाल्यो जाल्यार कोण तशी हरकत घेवचो ना. पूण बरेच बेकायदेशीर मार्गान चलतात. तांकां तातूंत वांगड दिवपी खूब जाण आसतात. नासले जाल्यार आयच्या काळांत पयसो दिवन तांकां आपोवं येता, आपल्या चुकीच्या कामांनी वांटेकार करून घेवं येता. जमीन बळकावप, बंदी आसतना बांदकामां करप ह्या धाडशी कामांक ओतो आयला. सध्या गाजता तें प्रकरण कोमुनिदादींचे जमनींत जाल्लीं बेकायदेशीर बांदकामां, खास करून घरां!! कायद्यांत दुरुस्ती करून हीं घरां कायदेशीर करपाची घोशणां तीन दिसां पयलीं जाली. ताचेर समेस्त विरोधी पक्षांनी खर प्रतिक्रिया दिल्यो. भायल्यांच्या मतां खातीर सरकार पक्ष तांचीं घरां कायदेशीर करपाक सोदता. गोंयकारांचेर हो अन्याय, अशें केल्यार फुडाराक तें माल पडटलें…. बऱ्याच पक्षांच्या फुडाऱ्यांनी आपापलीं मतां मांडलीं. ताचेर काल मुख्यमंत्री डाॅ. प्रमोद सावंत हांणी प्रतिक्रिया दिल्या. तांणी व्हडलो बाॅम्बगुळो घाला, अशे म्हणपाक जाता. अर्थांत जांकां खबर ना, तांचे खातीरुच हो धक्को. कोमुनिदादींचे जमनीचेर 70 ते 80 टक्के घरां गोंयकारांचीच आसात खंय!! उरिल्लीं 20 ते 30 टक्के घरां भायल्यांचीं. मागीर कायदो दुरुस्ती जातकच तींय कायदेशीर जालीं नात? न्यायालयान काणकोण, साळगांव सयत पांच कोमुनिदादींतल्या जमनींतलीं बेकायदेशीर घरां मोडपाचो आदेश दिला. हीं घरां वाटावपाचो यत्न सरकार करता. ताका लागून कायद्यांत दुरुस्ती करतले. पूण ती करतना कोमुनिदादींक विस्वासांत घेतले, अशें विरोधी फुडाऱ्यांनी म्हणलां. न्यायालयांत वचपाची, आंदोलन करपाचीय तांणी शिटकावणी दिल्या.
गोंयांत बरींच वर्सां बेकायदेशीर घरांक, शेडींक, खोपींक कायदेशीर रुप दिवपाचे प्रकार घडल्यात. ताका लागून हो ‘ट्रेंड’ जावपाक लागला. ‘आमचो आमदार, सरपंच सगलें सांबाळटलो. सरुया आमी मुखार. आयज ना, जाल्यार आनीक 10 वर्सांनी तरी जातलें बांदकाम कायदेशीर’ हो विचार आतां समाजांत किल्लला. ताचे फुडली गजाल म्हणल्यार थळाव्या, राज्य पांवड्या वयल्या लोकप्रतिनिधींक हाता कडेन धरल्यार कामां सहज जातात, हो समजूय दाट जाला. कांय कडेन गांवचे पंचायतीक खुटयाळ्याक हुमकळावन भायले भायर बांदकामां जाल्लीं आसात. लायट, उदक, सिवरेज, अबकारी परवाने मेळयिल्ले आसात. थोड्या बांदकामां खातीर तर कसलोच परवानो काडिल्लो ना. तांचेर आयिल्लें अरिश्ट पसून टळून गेलां. हें अशेंच चालू उरल्यार, गोंयचें कितें जातलें तें सांगपाक येना. ‘गोंय कोण जिखचो ना, व्हरचो ना, तें आपले आपुणूच सोंपतलें’, अशें पोर्तुगीज काळांत म्हणून दवरलां खंय. ताची सुरवात जाल्या अशें म्हणपाचें??
ह्याच स्तंभांत कांय दिसां पयलीं, कोमुनिदादींची 1993 वर्सा कितली जमीन आशिल्ली आनी आतां कितली आसा, ताचो नियाळ घेतल्यार धपको दिवपी म्हायती मेळटली, अशें म्हणिल्लें. कितली जमीन विकल्या, कितली सरकारान घेतल्या, कितले जमनीचेर अतिक्रमण जालां ताचो अभ्यास केल्यार धक्को दिवपी म्हायती मेळूं येता. अतिक्रमणाक, बेकायदेशीर घरांक फक्त आनी फक्त परप्रांतीय लोक जापसालदार आसात, एका पसून गोंयकाराचो हातूंत हात ना, अशें कांय जाणांक ‘प्रामाणिकपणा’न दिसता. आतां खुद्द सरकारान ह्या जमनींचेर 70 ते 80 टक्के घरां गोंयकारांचीं आसात, अशें म्हणलां. न्यायालय तीं मोडात म्हणटा, म्हणटकच तीं बेकायदेशीर जालीं नात?
लाला की बस्ती, मोती दोंगर, शापूर वस्ती, चिंबला, कारगील, दत्तगड, जुवारी नगर अशो साबार झोपडपट्ट्यो कोमुनिदाद जमनीचेर अतिक्रमण करून जाल्यात. हाचे फाटल्यान राजकारण्यांचो हात आसा, अशें रिव्होल्युशनरी गोवन्स पक्ष म्हणटा. कोर्टान आदेश दिल्लो आसतना सरकार फक्त मतां खातीर हें करता अशेंय तांचें म्हणणें. कोमुनिदादींक विस्वासांत घेवन कायद्यांत दुरुस्ती करतले, अशें सरकारान म्हणलां, तेच पद्दतीन हाचे मुखार सरकारी, कोमुनिदादीचे जमनींत एकूय बेकायदेशीर बांदकाम वा हेर कसलीच गजाल करपाक मेळची ना, अशीय दुरुस्ती करपाक मेळटली? थोडीच जमीन उरल्या,
ती वाटावया!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
