भांगरभूंय | प्रतिनिधी
ज्या निश्पाप 11 क्रिकेट मोग्यांक आपलो जीव व्हगडावचो पडलो ताका जापसालदार कोण? आयोजक, कर्नाटक सरकार काय स्वताचो जीव घाताक घालपी अतीउत्साही क्रिकेट मोगी?
रॉयल चॅलेंजर्स बंगळुरू म-हणल्यार आरसीबी पंगडान अठरा वर्सांत पयलेच फावटी आयपीएलाचो करंड उबारले उपरांत देशभर सुरू जाल्लें खोशयेचें वातावरण 24 वरां भितर शोक-दुख्खांत रुपांतर जालें. आरसीबीचो पंगड पयलेच फावटी आयपीएल जैतिवंत थारले उपरांत त्या पंगडाक येवकार आनी तांचें अभिनंदन करपा खातीर बंगळुरूच्या चिन्नास्वामी स्टेडियमार व्हड सुवाळो आयोजीत केल्लो. अर्थांत आपलो पंगड जैतवंत थारले उपरांत अशे तरेचो सुवाळो आयोजीत करपाची ही पयलीच खेप न्हय. हाचे पयलींय अशे खूबशे येवकार सुवाळे आयोजीत केल्ले. पूण ह्या येवकार सुवाळ्यांत जी खेटाखेट जावन दुर्दैवी घडणूक घडली अशी घडणूक हाचे पयली केन्नाच घडली ना. हे घडणुकेंत 11 निश्पाप क्रिकेट मोग्यांक आपलो जीव व्हगडावचो पडलो. जाल्यार 30 परस चड क्रिकेट मोगी गंभीर जखमी जाले. हे दुख्खाचे घडणुके उपरांत बंगळुरूंतच न्हय जाल्यार पुराय क्रिकेट मळार दुख्खाचें सांवट पातळ्ळें.
काळजाक पीळ घालपी हे दुर्दैवी घडणुके उपरांत खूबशे प्रस्न उपस्थीत जाले. मंगळारा मध्यान रातीं आयपीएलाची निमाणी मॅच सोंपले उपरांत 24 वरां भितर असो सुवाळो आयोजीत करपाची गरज आशिल्ली व्हय? हो सुवाळो आयोजीत करतना आयोजकांनी फावो ती तयारी केल्ली व्हय? फक्त 24 वरां भितर येदो मोटो सुवाळो आयोजीत करतना आयोजकांनी प्रशासना सयत पुलिसां कडेन चर्चा केल्ली व्हय? हो सुवाळो चिन्नस्वामी स्टेडियमार आयोजीत केलो. ह्या स्टेडियमाची तांक 35 ते 40 हजार इतल्या प्रेक्षकांची आसा. प्रत्यक्षांत ह्या सुवाळ्या खातीर ताचे धा पटीन म्हणल्यार अडेज ते तीन लाख क्रिकेट मोगी एकठांय जाले. ह्या सुवाळ्याक अपेक्षे परस चड क्रिकेट मोगी येतले असो अदमास आयोजकांक आयलो ना? आयिल्लो आसत जाल्यार तांणी तांकां नियंत्रणांत दवरपा खातीर कसली उपाय येवजण केली? गर्दी नियंत्रीत करपा खातीर फावो तें पुलीस बळ आशिल्लें? हो सुवाळो म्हणल्यार फक्त इव्हेंट आशिल्लो? ह्या सुवाळ्या फाटल्यान राजकी सुवार्थ सादपाचो बी आशिल्लो व्हय? आनी सगल्यांत निमाणो आनी म्हत्वाचो प्रस्न म्हणल्यार हे दुर्दैवी घडणुकेंत ज्या निश्पाप 11 क्रिकेट मोग्यांक आपलो जीव व्हगडावचो पडलो ताका जापसालदार कोण? आयोजक, कर्नाटक सरकार काय स्वताचो जीव घाताक घालपी अतीउत्साही क्रिकेट मोगी?
आतां हे घडणुकेची चवकशी करपा खातीर एखाद्या आयोगाची नेमणूक जातली. ह्या आयोगाक हे घडणुकेची चवकशी करपा खातीर कांय म्हयन्यांचो वेळ दितले. तो मेरेन मरण आयिल्ल्यांच्या आनी जखमी जाल्ल्यांच्या कुटुंबांक कांय लाखांची भरपाय दितले. राजकारणी सदचे प्रमाण एकामेकांचेर आरोप-प्रत्यारोप करून राजकी पोळी भाजून घेतले. पूण मूळ प्रस्नाचेर कोणूच उलोवचो नात. मुळांत घडणूक घडून गेले उपरांत ताची चवकशी करचे परस ती घडचीच न्हय हे खातीर यत्न जावंक जाय. आमी आयजूय गर्देचें वेवस्थापन करपाक उणे पडटात हें मान्य करचेंच पडटलें. तांकी परस चड गर्दी जायत जाल्यार ताचेर नियंत्रण हाडपाक प्रशासन अपेशी थारता हें हाचे पयलींय खूब फावटी सिद्ध जालां. गर्देचें वेवसपन करपाक आमी उणें कित्याक पडटात? हाचो अभ्यास प्रशासनान पयलीं करचो. विदेशांत गर्दीचें वेवस्थापन कशे तरेन करतात हाचो अभ्यास करपा खातीर सरकारान अधिकाऱ्यांक विदेशांत धाडचें.
भारतीय लोक उत्सव प्रीय आसात. चड करून तरणाट्यांक उत्सवांनी वांटेकार जावपाक खूब खोशी आसता. हेच खोशयेंतल्यान गर्दी वाडटा आनी अशी दुर्दैवी घडणूक घडटा. नागरिकांनी आपले उमेदीचेर नियंत्रण घालपाची सामकी गरज आसा. आपल्या जिवा परस व्हड कांयच ना हें सगल्यांनी लक्षांत घेवचें. अतीउमेद जिवाचेर येवंक शकता हाचें भान नागरिकांनी दवरचें. अशें भान जर नागरिकांनी दवरीत आनी प्रशासनान गर्दीचें वेवस्थापन बरे तरेन करीत जाल्यार अश्यो दुर्दैवी घडणुको घडच्यो नात आनी तातूंत निश्पाप लोकांचे बळी वच्चें नात. आतां जालें तें जालें, पूण फुडारांत तरी अश्यो घडणुको घडच्यो न्हय हाची खबरदारी दरेकान घेवची. हे घडणुकेंत जीव व्हगडायिल्ल्या 11 क्रिकेट मोगींक नमळायेचीं आर्गां.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
