उमेदी आनी तेजस्वी प्रकाश भटमाम !

भांगरभूंय | प्रतिनिधी

सोमार, 18 डिसेंबर दिसा सकाळीं भोवतेक काणकोणकारांच्या व्हॉटस्पार एक दुखदिणी खबर व्हायरल जाली आनी हजारांनी लोकांचे दोळे दुकांनी भरले बगर रावले नात. त्या दिसा फांतोडेर पैंगीण- काणकोणचे एक भोव लोकप्रीय तरनाटे प्रकाश भट हांकां अल्प काळाच्या दुयेंसा उपरांत मर्ण आयलें. प्रकाश भट वेवसायान पुरयत. प्रकाश भट म्हणल्यार एक लोहचुंबक. ताच्या सानिध्यांत जो येतालो तो सदचे खातीर ताका चिकटतालो. प्रकाश भटमामाच्या मर्णाची खबर कळटगीच ताच्या घरा लोटिल्ली गर्दी ही ताची गवाय.
प्रकाश भटमामाचें भुरगेपण पणसखंडेंच्या कुळागरांतल्या थंड शितळ वातारवरणांतलें. चारय वाटांनी दोंगर, वर्साक बाराय म्हयने व्हांवपी झरो, शेवण्यां- सुकण्यांचो सहवास ह्या सगल्यांक लागून आसत घडये, प्रकाश भटमामाचो सभाव कुळागारांतल्या आडसरावरी गोड, पणसावरी रसाळ, उदकावरी निर्मळ असो सैमाच्या ओडलायण्या गुणांचो! प्रकाश भटमाम फकत काणकोण म्हालांतच न्हय तर पुराय गोंयांत फामाद. आपल्या घरांत देवकार्य करपाचें आसल्यार ते खातीर प्रकाश भटमामच जाय ही येजमानांची मागणी…. आनी ते खातीर वर्सभर लेगीत वाट पळोवपाची तांची तयारी.
सत्यनारायणाचे पुजेक देवाची मुर्त फुलांनी सजोवपाची कला प्रकाश भटमामा कडच्यान कोणेय शिकची. नास्तीक मनीस लेगीत सहजपणान देवाच्या त्या सजयिल्ल्या मुर्तीक नमस्कार करतलो इतली नजाकता ताच्या कलाकारींत आसताली. ताचे मंत्रोच्चार एकदम स्पश्ट. एखादी क्रिया करतना तिचे फाटलो उद्देश सांगपाची आनी येजमानाक केल्ल्या देवकार्याचें पुराय समाधान दिवपाची कळाशी ताचे लागीं आशिल्ली.
प्रकाश भटमामान पुरयतपणाक जोडूनच कांय वर्सां आदीं कॅटरिंगाचो वेवसाय सुरू केलो. हातूंत ताका ताची घरकान्न प्रतिक्षा हिचो पुराय आदार लाबलो. रुचीक खाण- जेवण आनी सामान्य लोकांक परवडपा सारखो दर हाका लागून तांचो कॅटरिंगाचो वेवसाय अल्प काळांत फुलत गेलो. प्रकाश भटमामा खातीर कॅटरिंग हो केन्नाच वेवसाय नाशिल्लो. ताचे खातीर समाजसेवा करपाचें तें एक माध्यम आशिल्लें. देखूनच, प्रकाश भटमामाचे आदर्श युवा संघ, सारस्वत संघ, समाज मंदीर- तामणे सारख्या साबार संस्थांनी भोवमान सुवाळे घडोवन हाडले. पैंगीणच्या अनंतव्रत संस्थेन सर्गेस्त विठ्ठल यशवंत प्रभुगांवकार उर्फ विठ्ठल मास्तर हांच्या उगडासाक गठीत केल्लो पयलो पुरस्कार तांकां भेटयलो हाचे वेल्यान तांच्या लोकप्रियतेची आनी कर्तुबाची गवाय येता. सन्मान जाले म्हूण प्रकाश भटमामाक केन्ना अहंकार बादलो ना. ताचे पांय सदांच जमनीर उरले.
प्रकाश भटमामाची मर्णा वेळार पिराय पन्नाशींतली. ताच्या तोंडार सदांच तेज आसतालें. नांवा वरीच ताच्या तोंडार सदांच प्रकाश फांकिल्लो आसतालो. ताका केन्ना कोणे चिंतेस्त पळयलो ना. कांय जाणांक सदां प्रसन्न रावपाचो वर मेळटा. प्रकाश भटमामाक तो मेळिल्लो आसपाक जाय. लागीं लागीं स म्हयने प्रकाश भटमाम गोंय वैजकी म्हाविद्यालयांत गंभीर दुयेंसाचेर उपचार घेतालो. ताका गूण पडचो आनी तो बेगीनच बरो जावन सदचे जिणेंत परतो येवचो अशी कितल्याश्याच लोकांनी प्रार्थना केल्ली. एकाद्या राजकी फुडाऱ्याक मेळपाक वा पळोवपाक वच्चें नात तितले लोक ताची खबर घेवंक बांबोळे हॉस्पिटलांत वताले. ताची घरकान्न, पूत, धूव आनी भाव हांणी ताका मर्णाच्या दारांतल्यान परतो हाडपाचे आपले परीन सगले यत्न केले. पूण सगल्यांक दुख्खांत घालून प्रकाश भटमाम सदचे खातीर परलोकांत विलीन जालो.
गोकर्ण पर्तगाळी जिवोत्तम मठांतल्यान वेदशास्त्राचें शिक्षण घेतले उपरांत पिरायेच्या फकत विसाव्या वर्सा प्रकाश भटमामान पुरयतपणाक आरंभ केलो. आनीकय कांय पुरयत इश्टांक वांगडा घेवन ताणें देवकार्याक एक वेगळो आयाम दिवपाचो यशस्वी यत्न केलो. ज्या परिवारांनी देवकार्य म्हणल्यार फकत एक उपचार मानताले तांकांय ताणी धर्मीक विधीं कडेन भावार्थान पळोवंक प्रेरीत केले. घरप्रवेशाक प्रकाश भटमामान मुखेल दाराचे भायर चित्रायिल्लें स्वस्तीक वा ॐ इतलें नकसूद आसतालें कीं घरमालकान कांय वर्सांनी रंग बदल्लो तरी तो स्वस्तीक वा ॐ तश्शें दवरतालो. ताणें घाल्ली रांगोळी तर एका फाकिवंत कलाकाराकच जमपाची!
जाणटे आसूं वा नेणटे, गिरेस्त आसूं वा दुबळे, सगल्यांक ताचो आदर आनी मोग. पिरायेन अंयशीं- णव्वद वर्सांचे जाणटे लेगीत ताका प्रकाश भटमाम म्हूण पाचारताले इतली ताची लोकप्रियता.
मनीस संवसाराक अंतरलो म्हणटगीच तो देवागेर गेलो अशें मानतात. सर्गांत देवकार्यां खातीर देवाक एका बऱ्या पुरयताची गरज आशिल्ली म्हूण ताणें धर्तरेवेल्यान प्रकाश भटमामाक आपोवन व्हेलो अशें पयर ताच्या एका इश्टान म्हणलें. देव, स्वर्ग ह्यो सगल्यो भावार्थाच्यो संकल्पना अशें मानप्यान लेगीत भावूक जावन सहमती दाखोवपा सारखें हें विधान.
पणसखंडें हो वाठार थंयच्या व्यंकटेश मठा खातीर फामाद. लग्नां, मुंजी वा हेर धर्मीक कार्यां हांगा सेगीत चालू आसतात. ह्या मठाच्या सोबितीकरणाच्या वावरांत हेरां वांगडाच प्रकाश भटमामय तन-मन-धन वावुरलो.
दारांत आयिल्ल्या आपल्या यजमानाक समाधानान परतो धाडप हें तत्व ताणें जिणेच्या निमण्या खिणा मेरेन पाळ्ळें. यजमानांक सोपें पडचें म्हूण आपल्या घरांतच तो देवकार्यां खातीर वेवस्था करतालो. देवकार्याची सगली जापसालदारकी तो आपल्या भुजांर घेतालो. अमुकच इतल्या दक्षिणेची अपेक्षा ताणें केन्ना बाळगिली ना. देवकार्यां वेळार आसरमांडी घालून बसपाची संवय ना ताचे खातीर खासा वेवस्था कर, कोणाक पुडवें न्हेसूंक येना ताका अळंगसाणेन तें न्हेसय, जेवणा उपरांत यजमानाक थोडो विसव घेवपा खातीर वेवस्था कर हें सगलें तो आपलें कर्तव्य म्हूण करतालो.
वेळ वता तशें सगलें जाग्यार पडटलें. पूण साबार घरांनी देवकार्यां वेळार प्रकाश भटमामाची उमेदी आनी तेजस्वी मूर्त तशेंच खणखणीत आवाजान भरिल्ले मंत्रोच्चार हांची याद येत उरतली.

अनंत अग्नी
9422439903