भांगरभूंय | प्रतिनिधी
दोन दिसांत जाहीरनामो
भांगरभूंय । प्रतिनिधी
पणजी : भारतीय जनता पक्षान बिरेस्तारा आनीक दोन उमेदवारांची घोशणा करून सगळे उमेदवार जाहीर केल्यात. पक्ष 40 जाग्यांचेर वेंचणूक लडटलो. 3 जागे मगोक सोडल्यात जाल्यार हेर 7 जाग्यांचेर अपक्षांक तेंको दितलो. फुडल्या दोन दिसांत जिल्हो पंचायती खातीर जाहीरनाम्याचें लेगीत प्रकाशन जातलें, अशी म्हायती प्रदेश भाजप अध्यक्ष दामू नायक हांणी दिली.
जिल्हो पंचायत वेंचणूक 20 डिसेंबराक जातली. ती पयलींच निश्चीत जाल्ली आसली तरी आचारसंहिता 29 नोव्हेंबराक जाहीर जाली. सगळ्यांत पयली आम आदमी पक्षान उमेदवार जाहीर करपाक सुरवात केल्ली. आचारसंहिता लागू जाले उपरांत सत्ताधारी भारतीय जनता पक्षान सेगीत 4 वळेरींनी 40 उमेदवार जाहीर केलें. बिरेस्तारा 2 उमेदवारांची निमाणी वळेरी जाहीर केली. दवर्ली मतदारसंघातल्यान सत्यविजय नायक (ओबीसी) आनी नावेली मतदारसंघातल्यान लक्ष्मी बाबुराव शेटकार (बायलां ओबीसी) हांचे नांवांची घोशणा बिरेस्तारा जाली.
भारतीय जनता पक्षान सगळ्या उमेदवारांची घोशणा केल्या. सगळ्या उमेदवारांनी प्रचार लेगीत सुरू केला. तीन मतदारसंघ मगोक सोडल्या. ते मतदारसंघ जाहीर करपाची जापसालदारी मगोची आसा. हेर सात मतदारसंघात पक्ष अपक्षांक तेंको दितलो, अशें अध्यक्ष दामू नायक हांणी स्पश्ट केलां.
बिरेस्तारा जाहीर जाल्ले भाजप उमेदवार
दवर्ली – सत्यविजय नायक (ओबीसी)
नावेली – लक्ष्मी बाबुराव शेटकार (बायलां ओबीसी)
तरेकवार पक्षां कडल्यान जाहीर जाल्ले उमेदवार
भाजप : 40
आप : 29
काँग्रेस : 11
आरजी : 12
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
