भांगरभूंय | प्रतिनिधी
उमेदवारां विशीं मुख्यमंत्र्यान केली केंद्रीय फुडाऱ्यां कडेन चर्चा
भांगरभूंय । प्रतिनिधी
पणजी: भाजपाचे राष्ट्रीय अध्यक्ष जे. पी. नड्डा हांचे सयत हेर फुडाऱ्यां कडेन लोकसभा उमेदवारांच्या नांवांचेर चर्चा जाली. नांवां अजून निश्चीत जावंक ना, अशें मुख्यमंत्री डॉ. प्रमोद सावंत हांणी सांगलें.
विधानसभेच्या अर्थसंकल्पी अधिवेशनाक शुक्रारच्यान सुरवात जाली. पयल्या दिसा राज्यपालांचे अभिभाशण जालें उपरांत मुख्यमंत्री अचकीत दिल्ली गेले. मुख्यमंत्र्यांनी आयतारा दिल्ली भेटीचेर भाश्य केले. लोकसभा वेंचणुके खातीर पक्षाची तयारी सुरू जाल्या. उमेदवारांच्या नांवांचेर चर्चा जाली. उमेदवारांचीं नावां निश्चीत जावंक ना, प्रक्रिया चालू आसा, अशें मुख्यमंत्री डॉ. प्रमोद सावंत हांणी सांगलें.
मुख्यमंत्र्यांचे दिल्ली भेटीक लागून उमेदवारां विशीं तरेकवार चर्चा सुरू जाल्या. केंद्रीय मंत्री श्रीपाद नायक हांकांच उत्तर गोंयची उमेदवारी मेळपाची शक्यताय आसा. मुख्यमंत्री डॉ. प्रमोद सावंत हांणी कांय दिसां पयलीं सांखळे तांच्या नांवाची घोशणा लेगीत केल्ली. आदले आमदार दयानंद सोपटे, दिलीप परूळेकार हे उमेदवारी खातीर इत्सूक आसात. नव्या लोकां कडेन नेतृत्व दिवपाचो पायंडो भाजपांत सुरू जाला. हाका लागून उत्तर गोंयांत लेगीत नवें मुखामळ लेगीत फुडें येवंक शकता.
दक्षीण गोंयचे उमेदवारी खातीर आदले खासदार अॅड. नरेंद्र सावयकार, दिगंबर कामत, चंद्रकांत कवळेकार आनी सभापती रमेश तवडकार हांचीं नांवां चर्चेंत आसात. ह्या चार नावांचेर चर्चा जावन उमेदवार थारतलो.
लोकसभा वेंचणुकेची तारीख अजून जाहीर जावपाची आसा. तारीख जाहीर जावचे आदीं उमेदवारांची वळेरी जाहीर जावची ना.
प्रधानमंत्र्यांची फाल्यां सभाः मुख्यमंत्री
प्रधानमंत्री नरेंद्र मोदी हे मंगळारा गोंयांत येतात. उर्जा सप्तकाच्या उक्तावणा सयत तांचीं मडगांवां सभा जातली. सभेची तयारी नेटान सुरू आसा. विकसीत भारत संकल्प यात्रेचेर आदारीत ही सभा जातली, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
